Պիկասսոյի և Մատիսի նկարները, որոնք այս տարվա մայիսին գողացել էին Փարիզի Ժամանակակից արվեստի թանգարանից, հնարավոր է, ոչնչացվել են կողոպուտի ենթադրյալ մասնակիցներից մեկի կողմից: Այս մասին գրում է ֆրանսիական Le Journal du Dimanche շաբաթաթերթը` վկայակոչելով Փարիզի ոստիկանության աղբյուրը:
Մայիսի 19-ի լույս 20-ի գիշերը թանգարանից գողացել էին 100 մլն եվրո ընդհանուր արժողությամբ 5 կտավ: Հանցագործությունից անմիջապես հետո Ֆրանսիայի ոստիկանությունը ենթադրում էր, որ հանցագործությունն իրականացրել է մեկ մարդ` ինչ-որ մեկի պատվերով, քանի որ բաց շուկայում դրանք հանրավոր չէ վաճառել:
Հոկտեմբերի 1-ին հայտնի է դարձել, որ այդ գործով Փարիզում ձերբակալվել է 3 մարդ: Պարբերականը գրում է, որ մասնակիցներից մեկը` 34-ամյա ժամագործ Ջոնաթան Բ-ն, խոստովանել է, որ իր ընկերների ձերբակալությունից հետո «խուճապի մեջ է հայտնվել, ոչնչացրել նկարները և նետել աղբամանը»: Պարբերականը գրում է, որ թեև ոստիկանությունը կասկածանքով է վերաբերում Ջոնաթանի հայտարարությանը, սակայն խուզարկուները չեն բացառում այդպիսի հնարավորությունը:
Համաշխարհային հայտնի նկարիչների կտավների կողոպուտը համարվում է արվեստի բնագավառում ամենաաղմկահարույց հանցագործություններից մեկը: Որոշ փորձագետների գնահատականներով` իրականում կտավների գինը կարող է հասնել 200 մլն եվրոյի:
