Հայ-թուրքական արձանագրությունները երկու երկրների հարաբերություններում էական որևէ առաջընթաց չգրանցեցին, ավելին՝ Հայաստանը դրանց ստորագրումից հետո միայն կորցնողի դերում հայտնվեց: «Առաջին լրատվական»-ի հետ զրույցում նման տեսակետ հայտնեց «Ժառանգություն» կուսակցության պատգամավոր Արմեն Մարտիրոսյանը:
«Այս պահի դրությամբ՝ Հայաստանը ոչինչ չի շահել, միայն կորցրել է և կորցրել է ամենագլխավորը` Սփյուռքի վստահությունը: Ճիշտ է, իշխանությունները, բայց ոչ` պետությունը, միջազգային հանրության աչքում կառուցողական գործընկերոջ համբավ ձեռք բերեցին, սակայն հայ-թուրքական սահմանները ինչպես որ փակ էին, այդպես էլ փակ մնացին: Արդյունքում՝ ունենք այն, ինչ ունենք»,- եզրակացրեց պատգամավորը:
Նրա խոսքով՝ հայ-թուրքական գործընթացի պատճառով վերջին երկու տարիներին տուժել է նաև Ցեղասպանության ճանաչման հարցը: «Օրինակ՝ ԱՄՆ նախագահ Բարաք Օբաման ապրիլքսանչորսյան իր ուղերձներում չարտասանեց «ցեղասպանություն» բառը` իր այդ արարքը պատճառաբանելով սկսված հայ-թուրքական գործընթացով: Երկկողմ արձանագրությունների բացասական ասպեկտներից մեկն էլ ղարաբաղյան հակամարտության հարցում Թուրքիայի` հօգուտ Ադրբեջանի դիրքորոշման բարձրաձայնումն էր: Թուրքիան հասկանում է, որ Լեռնային Ղարաբաղն իր դոկտրինի համար ամենավտանգավոր կետերից է, և չի ցանկանում առանց դրա լուծման բացել Հայաստանի հետ սահմանները»,- նկատեց «Ժառանգության» ներկայացուցիչը:
Ամփոփելով` Արմեն Մարտիրոսյանը հիշեցրեց, որ Հայաստանի նախագահ Սերժ Սարգսյանը խոստացել էր իրադարձությունների նման ընթացքի ինչ-որ պահի արձանագրություններից հետ կանչել Հայաստանի ստորագրությունները: «Այդպիսի առիթներ մինչ այժմ եղել են, սակայն ստորագրություններն այդպես էլ հետ չեն կանչվել»,- փաստեց նա:
Հիշեցնենք, որ հայ-թուրքական արձանագրությունները ստորագրվել էին 2009 թ. հոկտեմբերին Ցյուրիխում: Թուրքիայի ապակառուցողական դիրքորոշման պատճառով ավելի ուշ դրանց վավերականացման գործընթացը կասեցվել էր: Անկարան 2011 թ. օգոստոսին Թուրքիայի խորհրդարանի օրակարգից հանել էր հայ-թուրքական արձանագրությունները, սակայն շաբաթներ առաջ կրկին վերադարձրել էր իր օրենսդիր մարմին:
