Կիրակի օրը Նյու Յորքի «Սենթրալ փարքում»` «Ելակի դաշտեր» հուշահամալիրի մոտ, The Beatles խմբի երկրպագուները նշել են խմբի հիմնադիրներից՝ 30 տարի առաջ սպանված Ջոն Լենոնի ծննդյան օրը:
Ռոք աստղի հազարավոր երկրպագումներ ամբողջ օրվա ընթացքում երգել են նրա ամենահայտնի հիթերը:
«Ես չեմ ձգտում սուրբ դառնալ: Ես երբեք չեմ ձգտել հասնել հոգու մաքրության: Ես երբեք չեմ ասել, որ բոլոր հարցերի պատասխաններն ունեմ: Ես միայն երգեր եմ գրել ու հարցերին պատասխանել եմ հնարավորինս անկեղծ»,- ասել է Լենոնը իր վերջին հարցազրույցներից մեկի ժամանակ, որը առաջին անգամ հրապարակել է Rolling Stone ամսագիրը:
«Այս ողբերգական օրը մենք մեծ սիրով և հարգանքով հիշում ենք Ջոնին: Այդքան կարճատև կյանքի ընթացքում` ընդամենը 40 տարի, նա այնքան բան է տվել աշխարհին: Մեծ հաջողություն է, որ աշխարհը ճանաչում է Ջոնին: Մենք մինչ այժմ շատ բան ունենք նրանից սովորելու: Ջոն, ես քեզ սիրում եմ»,- ասվում է Լենոնի այրու՝ Յոկո Օնոյի հաղորդագրության մեջ:
«Մենք սիրում ենք քեզ Ջոն»,- վանկարկել են մարդիկ` երգելով ռոք աստղի ամենահայտնի հիթերը:
Յոկո Օնոն նախկինի պես ապրում է «Դակոտա» տանը` «Ելակի դաշտերի» դիմաց, որի մուտքի մոտ 1980 թ. դեկտեմբերի 8-ին սպանվեց բոլոր ժամանակների լեգենդը:
Լենոնի տան դիմաց տեղադրված «Ելակի դաշտեր» հուշահամալիրը համարվում է հանգստի և լռության վայր: Տարվա մեջ միայն երկու անգամ` երաժշտի ծննդյան և մահվան օրը, այստեղ երգեր են հնչում և մոմեր վառվում:
«Ելակի դաշտեր» հուշահամալիրը կառուցվել է Լենոնի 45-ամյակի օրը: Դրա համար երաժշտի այրին ծախսել է մեկ միլիոն դոլար: Անվանումը վերցվել է 1966 թ. ստեղծված Լենոնի հայտնի Strawberry Fields Forever երգից: