«Հայաստանում գրանցվել է մթնոլորտի աղտոտվածության բարելավում»,- այսօր լրագրողների հետ հանդիպման ժամանակ ասաց ՀՀ բնապահպանության նախարարության մթնոլորտային օդի քաղաքականության բաժնի պետ Մարտիրոս Ծառուկյանը` խոսելով «Մթնոլորտի պահպանության հիմնախնդիրները» թեմայի շուրջ: Բանախոսը ներկայացրեց, թե մթնոլորտի կառավարման ինչ մեխանիզմներ կան: Դրանք երեքն են` իրավիճակի մոնիտորինգ, արտանետումների հաշվառում և վերահսկողություն:
«Տնտեսության այսօրվա պայմաններում մթնոլորտը աղտոտված է: Երկու մասի կարելի է բաժանել հիմնախնդիրները`տեղական և գլոբալ `միջազգային պարտավորությունների հետ կապված»,- ասաց Մ. Ծառուկյանը` հավելելով, որ այս ոլորտում Հայաստանը երկու կոնվենցիայի է «մասնակցում»: Դրանցից մեկը ՄԱԿ-ի՝ Կլիմայի փոփոխության կոնվենցիան է, որով սահմանված բոլոր պարտավորությունների հարցում ՀՀ-ն առաջիններից մեկն է:
Ինչպես տեղեկացրեց Ծառուկյանը, կառավարման հիմնական գործիքներից մեկը մոնիտորինգն է, և, եթե դիտարկենք վերջին տարիների մոնիտորինգը, կտեսնենք բարելավում՝ հիմնականում երկու վնասակար նյութի առկայություն մթնոլորտում: «Գետնամերձ օզոնը և փոշին են գերակշռում, բայց սա հավաքական ցուցանիշ է»,- նկատեց Մ. Ծառուկյանը: Անդրադառնալով մոնիտորինգի համար նախատեսված տեխնիկային`նա նշեց, որ տեխնիկայի որակը բարելավվել է:
Ծառուկյանի փաստմամբ` խնդիրը միայն դիտակետերի քանակի պակասն է, ռեալ իրավիճակը տեսնելու համար ավելի շատ դիտակետեր են անհրաժեշտ: «Եթե մենք կարողանանք չբարեկարգված տարածքները պակասեցնել, ավելի մաքուր մթնոլոտ կունենանք»,- խորհուրդ տվեց մասնագետը՝ ավելացնելով, որ կարևորը մթնոլորտային օդի քաղաքականությունն է, և, ուսումնասիրելով համաշխարհային փորձը, պետք է մշակել մթնոլորտային օդի պահպանման հիմնական ուղղությունները, հայեցակարգերը, ինչպես արվեց երթուղային միջոցների արտանետումները պակասեցնելու ուղղությամբ:
«Արգելվեց կապարացված բենզինի օգտագործումը, արգելվեց առանց չեզոքացուցիչների մեքենաների ներմուծումը, ունենք աղտոտվածության վիճակի բարելավում, կարելի է կապել բենզինի որակի լավացման հետ և տրանսպորտային միջոցների տեխնիկական վիճակի հետ»,- ամփոփեց Մարտիրոս Ծառուկյանը:
