Թուրքական Cafe Siyaset կայքի փոխանցմամբ՝ Թուրքիայի արտգործնախարար Ահմեդ Դավութօղլուն կտրուկ քննադատել է Ֆրանսիայի նախագահ Նիկոլա Սարկոզիին՝ Երևանում Հայոց ցեղասպանության վերաբերյալ արած հայտարարությունների համար.
«Նա, ով մեզ խորհուրդ է տալիս պատմության հետ առերեսվել, թող սկզբում նայի հայելու մեջ և հիշի Ֆրանսիայի տևական գաղութատիրական քաղաքականությունը։ Կարծում եմ, որ այդպիսի հայտարարությունները քաղաքական օպորտունիզմ են։ Դժբախտաբար, հենց Եվրոպան թևակոխում է նախընտրական ժամանակաշրջան, մենք ականատես ենք լինում այդպիսի քաղաքական օպորտունիզմի։
Հենց ներկայումս այսպիսի հայտարարություններ հնչեցնելն ամբողջությամբ բխում է Ֆրանսիայի ներքին քաղաքականությունից։ Այդ հայտարարությունը չի համապատասխանում իրականությանը և բացասաբար է ազդում Թուրքիայի ու Հայաստանի միջև ընթացող գործընթացի վրա։
Մենք գիտենք մեր պատմությունը, սակայն մեր պատմությունն այն ժամանակաշրջանն է, երբ թուրքերը դարերով համատեղ ապրել են հայերի հետ։ Մենք մշտապես ընդունում ենք մեր պատմությունը»։
Հիշեցնենք՝ Սարկոզին Երևանում հայտարարել է, որ եթե մինչև տարեվերջ Թուրքիան չճանաչի Հայոց ցեղասպանությունը, ինչպես դա արել են այլ մեծ պետություններ, ապա իրենք կդիմեն այլ նախաձեռնությունների, այդ թվում՝ Ֆրանսիայում Ցեղասպանության ժխտումը քրեականացնող օրինագծի ընդունմանը։
