Ժողովրդական կուսակցության նախագահ Տիգրան Կարապետյանը Հայ ազգային կոնգրեսի ակցիաներին պատրաստակամ է միանալ միայն այն դեպքում, եթե վերջինս հայտարարի, որ հանրահավաքները չեն սահմանափակվելու մեկ շաբաթով կամ տաս օրով, այլ անժամկետ բնույթ են կրելու: Այս մասին նա ասաց «Առաջին լրատվականի» հետ զրույցում:
«ՀԱԿ-ին ձեռ կտա, որ իմ նման մարդը միանա իրենց: Բայց դա կլինի միայն այն ժամանակ, երբ նա հայտարարի, որ պատրաստ է վճռական և երկարաժամկետ գործողությունների: Ճիշտ է, ես ՀԱԿ-ի անդամ չեմ դառնա, բայց նրանց ակցիաներին միանշանակորեն կմիանամ»,- շեշտեց քաղաքական գործիչը:
Հարցին` հնարավոր համարո՞ւմ է, որ ՀԱԿ-ը հանդես գա անժամկետ հանրահավաքներ անցկացնելու կոչով, Տիգրան Կարապետյանը համոզմունք հայտնեց, որ նման հորդոր վաղ թե ուշ անպայման կլինի:
Ժողովրդական կուսակցության առաջնորդն ընդգծեց, որ ՀԱԿ-ի գործելակերպից, այն է՝ հանրահավաքները մեկ շաբաթով կամ տաս օրով անցկացնելուց, բացի իրենից, դժգոհ է նաև ժողովուրդը: «Հայ ազգային կոնգրեսն այլ ելք չունի, քան հանրահավաքները առավել վճռական դարձնելն է»,- ամփոփեց Կարապետյանը:
