Հոկտեմբերի 12-ն ամբողջ աշխարհը նշում է Ծխախոտի դեմ պայքարի օրը: 2009-ից, երբ Հայաստանի Հանրապետությունը վավերացրեց Ծխախոտի դեմ պայքարի շրջանակային կոնվենցիան, նախաձեռնողները հասարակական կազմակերպություններն էին, աջակցեց նաև առողջապահության նախարարությունը: Ծխախոտի դեմ պայքարի համաշխարհային օրը նշվում է մայիսի 4-ին: Այս մասին լրագրողների հետ հանդիպմանը տեղեկացրեց ՀՀ առողջապահության նախարարության հանրային առողջության բաժնի պետի ժամանակավոր պաշտոնակատար Ալեքսանդր Բազարչյանը:
Ծխախոտի օգտագործման տարածվածությունը բարձր է մեծահասակ տղամարդկանց` 51-52 տարեկանների շրջանում, կանանց մոտ այդ ցուցանիշը երեք տոկոս է: Ինչ վերաբերոմ է կանանց շրջանում ծխախոտի տարածվածությանը, ապա, ըստ նրա, Երևանում բարձր է կին ծխողների տոկոսը, մարզերում` ցածր է:
Դեռահասաների շրջանում հիմնականում ծխում են սկսած 15-16 տարեկանից: Ծխում է շուրջ 6 տոկոսը: Ծխախոտի տարածվածության վիճակը, Վրաստանի համեմատ, մեզանում ավելի բարենպաստ է:
Եթե համեմատենք նախկին խորհրդային հանրապետությունների հետ, ապա դարձյալ վիճակը բարվոք է: Օրինակ` Ուկրաինայում շատ բարձր է ծխող կանանց տոկոսը:
«Սա օր է հանուն կյանքի, հանուն առողջ ապրելակերպի»,- ասաց «Կանաչաստան» ՀԿ-ի տնօրեն Տիգրան Ճորոխյանը: Նրա խոսքով` ծխողներն առաջին հերթին վնասում են իրենց սիրելի մարդկանց, պետությունը միայնակ չի կարող հաղթահարել այս խնդիրը: Ըստ նրա` քաղաքացիական հասարակությունը դեռ շատ քայլեր պետք է կատարի` ծխախոտի դեմ պայքարն արդյունավետ իրականացնելու համար: Ներկայում ընթանում է ծխախոտի դեմ պայքարի սոցիալական գովազդի նկարահանումներ: «Յուրաքանչյուրս պետք է բարձրաձայնի գոնե խնդրի մասին»,- ասաց Տիգրան Ճորոխյանը:
Հոկտեմբերի տասներկուսից նախատեսվում են ոստիկանների հետ այցեր` կրթական, առողջապահական ու մշակութային հիմնարկներ:
Բազարչյանի խոսքով` երկրորդական ծուխը վտանգավոր է առաջին հերթին հենց ծխողի, ապա նրան շրջապատողների համար:
«Պասիվ ծխելն ունի նույն ռիսկը, ինչ ակտիվ ծխելը, ու վտանգավոր է առաջին հերթին երեխաների համար»,- ասաց նա: Մարդիկ երկրորդական ծխի են ենթարկվում իրենց սեփական տանը, երբ ծխում է ընտանիքի անդամներից մեկը:
