ՆԳ նախկին նախարար Սուրեն Աբրահամյան այսօր Ազատության հրապարակում ելույթ ունենալով՝ նշեց. «Ես ցանկանում եմ խոսել արտագաղթից: Ես խուսափում եմ այդ հարցի մասին խոսել, որովհետև որոշակի ինֆորմացիայի պակաս ունեմ, այդ պատճառով ինչ կասեմ՝ դա լոկ իմ կարծիքն է, եթե հայհոյանքներ են լինելու, ապա իմ հասցեին, ոչ՝ ՀԱԿ-ի:
Ղարաբաղի հարցի հետ կապված՝ փառք ու պատիվ մեր բոլոր ազատամարտիկներին, առաջին հերթին զոհվածներին, փառք ու պատիվ մեր բոլոր զորահրամանատարներին, հայ ժողովրդին, որ վերջապես հազարավոր տարիներ հետո կարողացանք մեր սեփական հողը պաշտպանել: Ամենամեծ գաղտնիքը դա հողին կառչած ղարաբաղցու կերպարն է, հողը ապրելով են պահում: Ես քարանձավային հայրենասիրություն չեմ սիրում, և եթե իմ ձեռքը լիներ՝ բոլոր հայրենակցական միությունները կվերացնեի»:
Ամենասոսկալի բանը, ըստ Ս.Աբրահամյանի, Ղարաբաղի արտագաղթն է: «Եթե Հայաստանի արտագաղթը ողբերգություն է, ապա ԼՂ-ի արտագաղթը սոսկալի է: Ղարաբաղցին պետք է համոզված լինի, որ ոչ մի իշխանություն Ղարաբաղը տալու մտադրություն չունի: Ոչինչ սարսափելի չէ, եթե այնտեղ մարդիկ են բնակվում: Ղարաբաղցին մեզ չի հավատալու, այլ իր նվիրյալներին: Բոլոր պետական պաշտոնյաները, որոնք այդ հոսանքով են այստեղ եկել, և առաջին հերթին Ռ.Քոչարյանը պետք է վերցնի իր խանութը և հեռանա: Այդ թվում՝ Արկադի Ղուկասյանը, Սամվել Բաբայանը, բոլորը պետք է Ղարաբաղում ապրեն: Նրանք էլ Ձեր կարիքն ունեն:
Մի դիտարկում ևս. վերջին ժամանակները՝ կապված երկխոսության հետ, ցավոք, լսում ենք հետևյալ խոսքերը՝ մենք ոչ մի զիջման չենք գնա, որովհետև իշխանությունը ուժեղ է: Ես անընդունելի եմ համարում այս արտահայտությունը, ոնց կարող է ուժեղ իշխանություն լինել, ուժեղ պետք է պետությունը լինի, իշխանությունը`ոչ:
ՀՀ նորօրյա պատմությունը գրողները դուք եք, ես համոզված եմ, որ Դուք հասնելու եք Հայաստանում օրինական իշխանություն հաստատելու սուրբ գործին: Միասին եղեք, ապագան Ձերն է, և մենք հաղթելու ենք:
Հաղթանակ, հաղթանակ, հաղթանակ»,- ավարտեց իր խոսքը Ս. Աբրահամյանը:
