«Րաֆֆի Հովհաննիսյանը միշտ այնտեղ է, որտեղ կան խնդիրներ, հասարակությանը մտահոգող հարցեր»,- «Առաջին լրատվականի» հետ զրույցում անդրադառնալով Րաֆֆի Հովհաննիսյանի երեկվա այցին Ազատության հրապարակ՝ կարծիք հայտնեց «Ժառանգություն» կուսակցության վարչության քարտուղար Կարինե Հակոբյանը և հավելեց. «Այն, որ պարոն Հովհաննիսյանը գնում է Ազատության հրապարակ՝ ոչինչ չի նշանակում, բացի նրանից, որ նա էլ ժողովրդի մի մասնիկն է»:
Նա նշեց, որ «Ժառանգությունն» այլ քաղաքականության կողմնակից է և իշխանությունների հետ երկխոսության այն եղանակը, որն ընտրել է ՀԱԿ-ը իրենց համար անընդունելի է:
Հարցին՝ արդյոք բացառո՞ւմ է ՀԱԿ-«Ժառանգություն» համագործակցությունը, Հակոբյանը պատասխանեց. «Դա կախված է այն բանից, թե ինչ ճանապարհով կընթանա ՀԱԿ-ը, ներկայիս ճանապարհը մեզ համար անընդունելի է: Մեզ համար անընդունելի են գործողությունների հակասությունները, քաղաքականության մեջ նույնպես պետք է լինել սկզբունքային, այն, ինչ մենք չենք տեսնում ՀԱԿ-ի ղեկավարների գործելաոճում»:
Կարինե Հակոբյանը նշեց, որ ՀԱԿ-ը և «Ժառանգությունը» կարող են համագործակցել այն դեպքում, երբ ՀԱԿ-ը ժողովրդին ոչ թե որպես մասա կօգտագործի սեփական հանրահավաքների համար, այլ կգնա ժողովրդի պահանջների հետևից. «Ոչ թե ժողովրդին պետք է օգտագործել որպես գործիք, այլ ինքը պետք է լինի ժողովրդի գործիքը, և այդ դեպքում մենք նույն դաշտում կլինենք, որովհետև մենք գտնում ենք, որ մենք ենք հասարակության գործիքը»:
Հակոբյանը նկատեց, որ այսօր ժողովրդի կարծիքն այն է, որ պետք է վերջ տրվի երկրում տիրող սանձարձակությանն ու անվերահսկելի կողոպուտին: Հարցին, թե ի՞նչ միջոցով է «Ժառանգությունը» դա իրականացնելու՝ Հակոբյանը պատասխանեց. «Մենք գտնում ենք, որ ընդդիմությունը պետք է լինի միասնական, իսկ այն ինչ անում է այսօր ՀԱԿ-ը՝ պառակտում է ընդդիմությունը»:
