Ադրբեջանական Salam News գործակալությանը տված հարցազրույցի ժամանակ Ադրբեջանի նախկին նախագահ Այազ Մութալիբովը դժգոհել է, որ ԵԱՀԿ Մինսկի խմբի համանախագահող երկրները քրիստոնյա երկրներ են.
«Այն փաստը, որ Ղարաբաղյան հակամարտության կարգավորմամբ զբաղվող ԵԱՀԿ Մինսկի խմբի համանախագահող երկրները՝ ԱՄՆ-ը, Ռուսաստանն ու Ֆրանսիան, հանդիսանում են քրիստոնյա երկրներ, «պայմաններ է ստեղծում հայկական օկուպացիայի» համար։ Հայաստանը «փորձում» է Ղարաբաղյան պատերազմն աշխարհին ներկայացնել որպես «քրիստոնեական-մուսուլմանական պատերազմ»։
Հայերը «հմտորեն օգտվում են» նրանից, որ ԱՄՆ-ը, Ռուսաստանը և Ֆրանսիան քրիստոնյա երկրներ են։ Դրա համար էլ Ադրբեջանը պետք է այնպիսի արտաքին քաղաքականություն վարի, որ ԱՄՆ-ը, Ռուսաստանն ու Ֆրանսիան գոհ մնան։ Ադրբեջանը պետք է կամրջի դեր խաղա Արևմուտքի ու Արևելքի միջև՝ պահպանելով քրիստոնեական և մուսուլմանական աշխարհների միջև հավասարակշռությունը։ Եթե Ադրբեջանը կարողանա պահպանել այդ հավասարակշռությունը, ապա Հայաստանը չի կարողանա օգտվել դրանից։
ԵԱՀԿ Մինսկի խմբի համանախագահող երկրներն անհրաժեշտ ջանքեր չեն գործադրում Ղարաբաղյան հակամարտության կարգավորման համար։ Վերջին 15 տարիներին նրանց ջանքերն ապարդյուն են անցել։ Ձախողման պատճառն այն է, որ նրանցից յուրաքանչյուրն ունի իր շահերը։ ԱՄՆ-ը, Ռուսաստանն ու Ֆրանսիան Ղարաբաղյան հակամարտությունում ունեն իրենց շահերը»։
Հիշեցնենք, որ Մութալիբովը Ադրբեջանի Հանրապետության առաջին նախագահն է (մինչև 1992 թվականի գարունը)։