News Georgia-ի փոխանցմամբ՝ այսօր Մոսկվայում հանդիպելու են Ռուսաստանի ու Աբխազիայի նախագահներ Դմիտրի Մեդվեդևն ու Ալեքսանդր Անկվաբը։
Ակնկալվում է, որ հանդիպման ժամանակ կողմերը քննարկելու են միջպետական փոխհամագործակցության կոնկրետ ասպեկտներ, անվտանգության, սոցիալ-տնտեսական ոլորտներում Աբխազիային օգնություն տրամադրելուն, միջազգային արենայում կոորդինացմանը, երկկողմանի հարաբերությունների հետագա զարգացմանը և Աբխազիայում բնակվող Ռուսաստանի քաղաքացիների ունեցվածքային իրավունքին առնչվող խնդիրներ։
Նշվում է, որ 2008 թվականի սեպտեմբերից սկսած՝ Ռուսաստանի ու Աբխազիայի միջև ապրանքաշրջանառությունը կրկնապատկվել է՝ կազմելով ավելի քան 225 միլիոն դոլար։ Բացի այդ, Ռուսաստանի ու Աբխազիայի միջև կնքվել է ավելի քան 60 տարբեր մակարդակի համաձայնագիր, ևս ավելի քան 30-ը գտնվում է մշակման փուլում։
Հիշեցնենք, որ սա օգոստոսի 26-ին Աբխազիայի նախագահ ընտրվելուց հետո Ալեքսանդր Անկվաբի առաջին ռուսական այցն է։ Աբխազիայի նախագահ ընտրվելուց հետո Անկվաբը հայտարարարել էր, որ շարունակելու է Ռուսաստանի հետ ռազմավարական դաշնակցային հարաբերությունների ամրագրման քաղաքական կուրսը։
