ՀՔԴՄ նախագահ, Հանրային խորհրդի անդամ Խոսրով Հարությունյանն այսօր հրավիրված ասուլիսում անդրադարձավ նաև ՀԱԿ-իշխանություն ընդհատված երկխոսությանը:
Նրա գնահատմամբ՝ երկխոսությունը հայաստանյան քաղաքական մշակույթի մեջ նոր ավանդույթ էր ձևավորելու, ինչում շահագրգռված են բոլորը: Այս կերպ հնարավոր կլիներ ձևավորել ընդդիմության մեկ այլ կերպար, երբ վերջինս ոչ թե միայն հայհոյում է, այլ հարցերի լուծման հասնում է կառուցողական երկխոսության միջոցով:
Ըստ Հարությունյանի՝ բացի հանրության համար օգտակար լինելուց, երկխոսությունը պետք էր նաև կողմերին: Նրա կարծիքով՝ Սերժ Սարգսյանի նախաձեռնությունը փորձ էր՝ քաղաքական զարգացումները փողոցներից տեղափոխել բանակցությունների սեղանի շուրջ և արտախորհրդարանական ընդդիմադիր ուժին քաղաքական պրոցեսների վրա ազդելու հնարավորություններ տալ. «Երկխոսությունը պետք էր նաև ՀԱԿ-ին, որովհետև այդ կերպ ՀԱԿ-ը կապացուցեր, ինչն էլ անում է, որ ընդդիմությունը միայն ինքն է, այլապես էլ ինչու պետք է հենց իր հետ երկխոսեին»:
Հարությունյանը նաև շեշետեց, որ նախընտրական այս փուլում երկխոսությունն առավել շատ և առաջին հերթին պետք է հենց ՀԱԿ-ին:
Նրա խոսքերով՝ արտահերթ ընտրությունների մասին խոսելն էլ ավելորդ է. «Բոլորն էլ գիտեն, որ դա ՀԱԿ-ը ուղղակի ասում է, որովհետև դա ասվել է, և մինչև վերջ պետք է հավատարիմ մնա սեփական կարգախոսին: Դա այսօր արդեն հռետորաբանության է վերածվել»:
Հարությունյանը նաև հավելեց, որ առաջիկա ընտրություններին ՀԱԿ-ը պետք է մոտենա նվազագույն կորուստներով, իսկ երկխոսությունը լավագույն հնարավորությունն էր՝ պահպանել սեփական քաղաքական կշիռը և ընտրազանգվածը. «Երկխոսությունն ինչ-որ մի տեղ ՀԱԿ-ի համար փրկօղակ էր»: