«Իսկ պարոն Քոչարյանը հայտարարե՞լ է, որ ինքը դուրս է գալիս քաղաքականությունից, իհարկե՝ ոչ: Ռոբերտ Քոչարյանը եղել է և կա քաղաքականության մեջ: Նա չի հայտարարել, որ ինքը դուրս է գալիս քաղաքականությունից, ուրեմն քաղաքականության մեջ է: Իսկ ակտիվ քաղաքականության համար ասել է, որ չի բացառվում իր վերադարձը և երեք նախապայման էր ասել դրա համար»,- լրագրողների հետ հանդիպման ժամանակ, խոսելով Ռոբերտ Քոչարյանի քաղաքական դաշտ վերադարձի մասին, կարծիք հայտնեց Հայաստանի Քրիստոնեադեմոկրատական միության նախագահ Խոսրով Հարությունյանը:
Հարությունյանը նաև նկատեց, որ Քոչարյանի առաջ քաշած երեք նախապայմանները շատ «սուբյեկտիվ գնահատմամբ առարկաներ» են և հնարավոր է՝ նման նախապայմաններ չլինեն, բայց Քոչարյանը համարի, որ դրանք կան, ինչն էլ ժամանակը ցույց կտա: «Ես կարծում եմ, որ պարոն Քոչարյանին մեծ, ակտիվ քաղաքականություն վերադարձնելու հնարավորություն միշտ էլ կա»,- ասաց Հարությունյանը:
Ինչ վերաբերում է Քոչարյանի նշած նախապայմաններից մեկին` սոցիալ-տնտեսական վատթար վիճակին, Հարությունյանը նշեց, որ Հայաստանն իր տնտեսությամբ կզղիացված չէ, շատ թույլ, բայց ինտեգրված է միջազգային գլոբալ պրոցեսներում, և ճգնաժամը չէր կարող շրջանցել Հայաստանը: Նրա կարծիքով՝ տնտեսական ճգնաժամի պայմաններում կառավարության գործունեությունը պետք է գնահատել ոչ թե ձեռք բերված հաջողություններով, այլ հնարավոր քիչ կորուստներով. «Այս տեսանկյունից վերլուծելով կառավարության գործունեությունը՝ պետք է արձանագրենք, որ ճգնաժամի երեք-չորս տարիներին որևէ սոցիալական մեծ ծրագիր չի խափանվել: Այո՛, մենք չունենք ՀՆԱ -ի երկնիշ աճ, այո՛, արձանագրեցինք գյուղատնտեսության և շինարարության ոլորտների սարսափելի անկում, բայց մենք արձանագրեցինք արտահանման աճ: Բայց ամենահիմնական գնահատականը` կառավարությանը հաջողվեց զերծ մնալ հիմնական կորուստներից, դա ակնհայտ է»:
