Երևանում այսօր կայացել է հայ-քուվեյթական միջկառավարական հանձնաժողովի անդրանիկ նիստը` ՀՀ փոխվարչապետ, տարածքային կառավարման նախարար Արմեն Գևորգյանի և Քուվեյթի Պետության ֆինանսների նախարար Մուստաֆա Ջասեմ ալ Շամալիի համանախագահությամբ:
Նիստում քննարկվել են տնտեսական, առևտրի, ներդրումների, գիտատեխնիկական, կրթական և մշակութային ոլորտներում համագործակցության ներկա վիճակը և զարգացման հեռանկարները, կարևորվեց առևտրատնտեսական հարաբերությունների խորացման և ընդլայնման անհրաժեշտությունը: Արձանագրվել է, որ վերջին շրջանում երկկողմ շփումների ակտիվացում է նկատվում, ինչին նպաստել են բարձր մակարդակով փոխայցելությունները, ինչպես նաև Քուվեյթում Հայաստանի դեսպանատան բացումը: Նշվել է, որ առաջիկայում Հայաստանում Քուվեյթի դիվանագիտական ներկայացուցչության հիմնումը կարևոր նշանակություն կունենա երկկողմ հարաբերությունների զարգացման և ամրապնդման համար:
Քննարկումների արդյունքում ստորագրվեց «Հայաստանի Հանրապետության կառավարության և Քուվեյթի Պետության կառավարության միջև օդային հաղորդակցությունների մասին» համաձայնագիրը, ինչպես նաև նիստի արձանագրությունը:
Նիստի արդյունքում որոշվել է, որ
-կկազմակերպվեն գործարարների փոխայցելություններ, համատեղ գործարար համաժողովներ և ցուցահանդեսներ
-ջանքեր կգործադրվեն ՀՀ գործարար ծրագրերում քուվեյթական կողմի հնարավոր մասնակցությունն ապահովելու համար
-կքննարկվեն ներդրումային ոլորտում համագործակցության և փորձի փոխանակման հեռանկարները
– Հայաստանից Քուվեյթ գյուղատնտեսական ապրանքների արտահանման, մրցունակության հնարավորությունները գնահատելու և գործնական կապեր հաստատելու նպատակով հայկական կողմը փորձագետների պատվիրակություն կգործուղի Քուվեյթ
-կուսումնասիրվեն շինանյութերի արտադրության, դեղագործության և ոսկերչության ոլորտներում համագործակցության հնարավորությունները
-կուսումնասիրվեն տրանսպորտի, կապի, մաքսային ոլորտի, առողջապահության, մշակույթի, գիտության, կրթության, քաղաքաշինության, էներգետիկայի, բանկային համակարգի ոլորտներում համագործակցության զարգացման հեռանկարները, աշխատանքներ կտարվեն այդ և այլ ուղղություններով իրավապայմանագրային դաշտի ձևավորման կամ ընդլայնման ուղղությամբ:
Որոշվել է նաև, որ Հայաստան-Քուվեյթ տնտեսական կապերը խթանելու և օտարերկրյա ներդրումներ ներգրավելու նպատակով 2011թ. նոյեմբերին Զարգացման հայկական գործակալությունը Քուվեյթում կանցկացնի գործարար գովազդային քարոզարշավ, որի շրջանակում Քուվեյթի գործարարներին կներկայացվեն տնտեսության ճյուղերին վերաբերող ներդրումային ծրագրեր, հանդիպումներ կկայանան գյուղատնտեսության, սննդի վերամշակման, էներգետիկայի, դեղագործության և զբոսաշրջության ոլորտների մի շարք քուվեյթական ընկերությունների հետ:
