Грузия Online-ի փոխանցմամբ՝ Մոսկվան փորձում է փոխել Ժնևյան բանակցությունների ձևաչափը։ Չնայած անվտանգության ու կայունության հարցը Ժնևում քննարկելու վերաբերյալ նախապես ձեռք բերված պայմանավորվածությանը՝ ռուսական կողմը երեկ Ժնևում խուսափել է բոլոր հարցերի քննարկումից՝ պահանջելով քննարկել Աբխազիայի և Հարավային Օսիայի կարգավիճակի հարցը։
Վրաստանի փոխարտգործնախարար Սերգի Կապանաձեն հայտարարել է, որ Ժնևյան հանդիպումը ձախողվել է Ռուսաստանի և Վրաստանի օկուպացված տարածքների խամաճիկային իշխանությունների պատճառով։ Ընդ որում, Կապանաձեն ընդգծել է, որ երեկ Ռուսաստանի դիրքորոշումը եղել է շատ ավելի կոշտ, քան երբևէ Ժնևյան բանակցությունների եռամյա պատմության ընթացքում։
Կապանաձեի խոսքերով՝ Մոսկվայի և խամաճիկային ռեժիմների ներկայացուցիչները շրջափակել են անգամ փոքր նշանակության հարցերի քննարկումը. «Նախկինում մենք պայմանավորվել էինք, որ Ժնևում քննարկելու ենք մի կողմից անվտանգության ու կայունության հարցեր, իսկ մյուս կողմից՝ հարկադիր վերաբնակների վերադարձի հարցը։
Աբխազիայի և Հարավային Օսիայի կարգավիճակի վերաբերյալ ոչ մի խոսք չի եղել։ Երեկվա հանդիպումը ցույց տվեց, որ Մոսկվան փորձում է խույս տալ այդ պայմանավորվածությունից և կարգավիճակի հարցը մղել առաջին պլան»։
Հիշեցնենք, որ Ժնևյան բանակցության գործընթացը մեկնարկել է 2008 թվականի օգոստոսին տեղի ունեցած ռուս-վրացական հնգօրյա պատերազմից հետո։ Դրան մասնակցում են Վրաստանի, Ռուսաստանի, ԱՄՆ-ի, ինչպես նաև Հարավային Օսիայի, Աբխազիայի, ՄԱԿ-ի, ԵԱՀԿ-ի ու ԵՄ-ի պատվիրակությունները։
