Խորհրդային միության տարիներին գիտնականների թիվը Հայաստանում 27 հազար էր` վերցրած գիտության բոլոր ոլորտները, և այդ թվով մենք մտնում էինք աշխարհի լավագույն եռյակի մեջ: Այս մասին այսօր լրագրողների հետ հանդիպմանն ասաց ֆիզիկամաթեմատիկական գիտությունների դոկտոր Արթուր Իշխանյանը` համեմատական անցկացնելով ներկայիս գիտնականների և խորհրդային տարիների գիտնականների թվի միջև:
«Ըստ բնակչության թվի, եթե բաժանում ենք 3 միլիոն բնակչությունը, ապա մոտավորապես ստանում ենք 9 հազար: Այսօրվա լավագույն ցուցանիշն ունի Իսրայելը` 18-20 հազար, ապա Շվեդիան` 10,5 հազար գիտնական»,- ասաց նա` նշելով, որ միջին թիվը 1 միլիոն բնակչության հաշվով մոտավորապես 3 հազար է: Հայաստանում այսօր, ընդհանուր առմամբ, կա 4000-4500 գիտնական, այսինքն` 1 միլիոն բնակչի հաշվով 1,5 հազար, ինչը վկայում է, որ թիվը կրկնակի ցածր է աշխարհի միջին ցուցանիշից: Դա մոտավորապես 7 անգամ ցածր է, քան խորհրդային տարիներին»,- ասաց Ա. Իշխանյանը` ընդգծելով, որ եթե մենք խորհրդային տարիներին մտնում էինք աշխարհի լավագույն եռյակի մեջ մեր ցուցանիշներով, ապա հիմա էլի մտնում ենք, բայց՝ արդեն վերջից:
