Մեծ Բրիտանիայի միապետների լոնդոնյան նստավայրից` Բուկինգհեմյան պալատից քիչ հեռու հատնաբերվել են Էլիզաբեթ 2-րդ թագուհու մեծ երկրպագուի մնացորդները: Ինչպես գրում է The Daily Mail պարբերականը, մարմինը հայտնաբերվել է Սենթ Ջեյմսի այգու տարածքում` պալատից մոտ 90 մետր հեռավորության վրա:
Պարբերականի տեղեկությունների համաձայն` մարմինը հայտնաբերվել է 2011 թ. մարտին թագավորական այգիները սպասարկող այգեպանի կողմից: Սակայն այդ ժամանակ ոչ մի պաշտոնական հայտարարություն չի եղել:
Պարզվել է, որ մարմինը պատկանում է 69-ամյա ամերիկացի Ռոբերթ Ջեյմս Մուրին, որը Մեծ Բրիտանիա էր եկել 2007 թ.: Նա 25 տարի շարունակ թագուհուն և թագավորական ընտանիքի մյուս անդամներին նամակներ, նկարներ և իբր վտանգավոր նյութերով տուփեր էր ուղարկում: Հետաքննության տվյալներով` Մուրը տառապում էր հոգեկան հիվանդությամբ:
Մահացածի ինքնությունը պարզվել է նրա մոտ գտնված փաստաթղթերի հիման վրա: Նրա մահվան պատճառները հայտնի չեն, մարմնի վրա վնասվածքներ չեն հայտնաբերվել:
Բուկինգհեմյան պալատում տեղի ունեցածը չեն մեկնաբանել:
