Ռուսաստանի Դաշնության նախագահ Վլադիմիր Պուտինն ինչպես Միացյալ Նահանգների նախագահ Դոնալդ Թրամփին, այնպես էլ իրանցի պաշտոնյաներին հայտնել է, որ աջակցում է միջուկային գործարքի գաղափարին, որի շրջանակներում Իրանը չի կարողանա ուրան հարստացնել։
Այս մասին հայտնում է Axios-ը՝ հղում կատարելով այդ քննարկումներին քաջատեղյակ աղբյուրներին ։
Նշվում է, որ քննարկումների ընթացքում Մոսկվան կոչ է արել Իրանին համաձայնել ուրանի «զրոյական հարստացմանը»։ Աղբյուրները հայտնել են, որ ռուսական կողմը նաև Իսրայելի կառավարությանն է տեղեկացրել Իրանի կողմից ուրանի հարստացման վերաբերյալ Պուտինի դիրքորոշման մասին։ Նշվում է, որ ՌԴ նախագահն այս դիրքորոշումը հայտնել է նաև Ֆրանսիայի նախագահ Էմանուել Մակրոնի հետ հեռախոսազրույցի ընթացքում։
Axios-ը գրում է, որ Իսրայելի ու Իրանի միջև 12-օրյա պատերազմի հետևանքով լուրջ վնասներ են հասցվել Իրանի միջուկային օբյեկտներին, սակայն ուրանի հարստացված պաշարներն ամբողջությամբ չեն ոչնչացվել։
Ըստ աղբյուրների՝ եթե առաջիկա շաբաթներին բանակցություններ տեղի ունենան, ապա Իրանի տարածքում ուրանի զրոյական հարստացումը կլինի ԱՄՆ-ի հիմնական պահանջներից մեկը։ Իրանը դեռ վաղուց պնդում է, որ ցանկացած համաձայնագրի շրջանակներում պետք է պահպանի հարստացման հնարավորությունը։
«Պուտինը կաջակցեր ուրանի զրոյական հարստացմանը։ Նա կոչ է արել իրանցիներին աշխատել այդ ուղղությամբ՝ ամերիկացիների հետ բանակցություններն ավելի բարենպաստ դարձնելու համար։ Իրանցիները հայտարարել են, որ չեն քննարկի այդ հարցը»,-ասել է իրավիճակին անմիջականորեն ծանոթ եվրոպացի պաշտոնյան։
