Հաագայում գործող Միջազգային քրեական դատարանը Աֆղանստանում իշխող «Թալիբան» շարժման բարձրագույն ղեկավարության երկու անդամների ձերբակալման օրեր է արձակել։
Դատավորները հաստատել են օրդերները՝ գտնելով, որ կան «հիմնավոր հիմքեր» ենթադրելու, որ գերագույն առաջնորդ Հայբաթուլլահ Ախունդզադան և գլխավոր դատավոր Աբդուլ Հաքիմ Հաքքանին մարդկության դեմ հանցագործություն են կատարել՝ կանանց և աղջիկների նկատմամբ ավելի ու ավելի խիստ սահմանափակումներ սահմանելով:
2021 թվականից, երբ թալիբները գրավեցին մայրաքաղաք Քաբուլը, և նախկին կառավարությունը փախավ երկրից, նոր ռեժիմը, ի թիվս այլոց, 12 տարեկանից բարձր աղջիկների համար փակեց կրթության հասանելիությունը, իսկ չափահաս կանանց արգելեց աշխատել բազմաթիվ աշխատատեղերում: Աֆղանստանում կանանց արգելվում է առանց տղամարդու ուղեկցության դուրս գալ տնից, ինչպես նաև նրանց արգելվում է հանրային վայրերում բարձրաձայն խոսել:
«Թեև «Թալիբանը» որոշակի կանոններ և արգելքներ է սահմանել ամբողջ բնակչության համար, աղջիկներին և կանանց այն հատկապես վերաբերում է սեռի հիման վրա՝ զրկելով նրանց հիմնարար իրավունքներից և ազատություններից»,- ասված է դատարանի հայտարարության մեջ:
Ի պատասխան՝ «Թալիբանը» հայտարարել է, որ չի ճանաչում ՄՔԴ-ն, և նրա օրդերը «ակնհայտ թշնամական գործողություն» է և «վիրավորանք համաշխարհային մուսուլմանների հավատքի նկատմամբ»:
