Ադրբեջանական ANS PRESS-ի փոխանցմամբ՝ ԵԱՀԿ Մինսկի խմբի համանախագահներ Ռոբերտ Բրադտկեն (ԱՄՆ), Բեռնար Ֆասիեն (Ֆրանսիա) և Իգոր Պոպովը (Ռուսաստան) իրենց հերթական տարածաշրջանային այցն իրականացնելու են այս ամսին։
Այս մասին ադրբեջանական APA լրատվական գործակալության մոսկովյան թղթակցին հայտնել է Իգոր Պոպովը։ Վերջինս նշել է, որ իրենք պլանավորել են տարածաշրջան այցելել մինչև տարեվերջ։ Նա ընդգծել է, որ այցի ստույգ ժամկետը դեռ հայտնի չէ, և իրենք աշխատանքներ են տանում այդ ուղղությամբ։
Պոպովը հավելել է, որ տարածաշրջանային այցի շրջանակներում իրենք հանդիպումներ են ունենալու Հայաստանի և Ադրբեջանի նախագահների ու արտգործնախարարների հետ, որոնցում քննարկելու են Ղարաբաղյան հակամարտության կարգավորման հարցը։
Հիշեցնենք, որ ավելի վաղ նշվում էր, թե համանախագահները տարածաշրջան են այցելելու մինչև սեպտեմբերի կեսը, սակայն դա տեղի չունեցավ, և նրանք հայկական ու ադրբեջանական կողմերի հետ հանդիպումներ ունեցան Նյու Յորքում ու Վարշավայում։