Ադրբեջանական Trend լրատվական գործակալության փոխանցմամբ՝ Nabucco-ն, ITGI-ն («Թուրքիա-Հունաստան-Իտալիա») և TAP-ը («Տրանսադրիատիկ») Ադրբեջանին ներկայացրել են գազամուղերի նախագծերի վերջնական առաջարկները։
Այս բոլոր խողովակաշարային նախագծերն էլ միտված են ադրբեջանական «Շահ Դենիզ» գազային հանքավայրի մշակման երկրորդ փուլում արդյունահանվելիք գազի՝ դեպի Եվրոպա փոխադրմանը։ Այժմ «Շահ Դենիզ»-ի մշակմամբ զբաղվող կոնսորցիումը պետք է դիտարկի այդ առաջարկները և վերջնական ընտրություն կատարի, թե որ նախագծին է նախապատվություն տալու։
Պլանավորված է, որ «Շահ Դենիզ»-ի գազային հանքավայրի 2-րդ փուլի մշակման արդյունքում տարեկան 10 միլիարդ խորանարդ մետր գազ է արտահանվելու դեպի Եվրոպա։
Հիշեցնենք, որ «Շահ Դենիզ»-ի գազային պաշարները գնահատվում են 1.2 միլիարդ տրիլիոն խորանարդ մետր։ «Շահ Դենիզ»-ի մշակման պայմանագիրը կնքվել է 1996 թվականի հունիսի 4-ին, կոնսորցիումի մեջ են մտնում բրիտանական BP-ն (տեխնիկական օպերատոր)՝ 25.5 տոկոս, նորվեգական Statoil-ը՝ 25.5 տոկոս, ադրբեջանական SOCAR-ը՝ 10 տոկոս, բրիտանական NICO-ն՝ 10 տոկոս, ֆրանսիական Total-ը՝ 10 տոկոս, ռուսական Lukoil-ը՝ 10 տոկոս, թուրքական TPAO-ն՝ 9 տոկոսը։