Ադրբեջանական Salam News գործակալության փոխանցմամբ՝ Ադրբեջանում Թուրքիայի դեսպան Հուլուսի Քըլըչն անդրադարձել է ձգձգվող թուրք-ադրբեջանական գազային բանակցություններին.
«Թուրքիայի և Ադրբեջանի միջև գազային պայմանագրի կնքումը հետաձգվել է այն պատճառով, որ դեռևս պատրաստ չեն դրան առնչվող փաստաթղթերը։ Փաստաթղթերի պատրաստումից հետո պայամանագիրը կստորագրվի։ Բանակցային գործընթացում որևէ խոչընդոտ գոյություն չունի։ Ամեն ինչ գնում է իր հունով։ Թուրքիան ներկայումս գազ է ստանում այլընտրանքային աղբյուրներից»։
Քըլըչը հավելել է, որ ներկայումս աշխատանքներ են տարվում նաև թուրք-ադրբեջանական Բարձր մակարդակի ռազմավարական համագործակցության նիստի ժամկետի ճշգրտման ուղղությամբ, որը, ամենայն հավանականությամբ, կայանալու է այս ամսին։
Հիշեցնենք, որ այս տարվա օգոստոսի վերջին Reuters գործակալությանը տված հարցազրույցի ժամանակ Թուրքիայի էներգետիկայի և բնական պաշարների նախարար Թաներ Յըլդըզը հայտարարել էր, որ Ադրբեջանն ու Ռուսաստանը պետք է նվազեցնեն Թուրքիային հատկացվող գազի գինը.
«Ռուսական «Գազպրոմ»-ը, փոխանակ նվազեցնելու մեզ մատակարարվող գազի գինը, վերջին 29 ամիսների ընթացքում 39 տոկոսով բարձրացրել է այն։ Մենք ցանկանում ենք մինչև սեպտեմբերի վերջը ստորագրել Ադրբեջանի հետ նոր գազային համաձայնագիրը»։
