«Անսպասելի էր, որ այդքան լուրջ վերլուծվեց Ռոբերտ Քոչարյանի վերջին հայտարարությունը, քանզի երկրորդ նախագահը միշտ էլ հարցազրույցներ տալիս էր, և միշտ էլ խոսվում էր նրա վերադարձի մասին»,- այսօր լրագրողների հետ հանդիպման ժամանակ նշեց «Ժառանգություն» կուսակցության փոխնախագահ Ռուբեն Հակոբյանը:
Ըստ նրա՝ իր համար անհասկանալի է, որ երկրորդ նախագահի վերադարձը պայմանավորում են Ռուսաստանի քաղաքական գործընթացներով, այն էլ այն ժամանակ, երբ նոր ենք տոնել անկախության քսանամյակը. «Սա վասալական տրամադրություն է առաջացնում»:
Հակոբյանի կարծիքով՝ անկախ նրանից Պուտինը կլինի Ռուսաստանի նախագահը, թե մեկ այլ անձ, Հայաստանի նկատմամաբ Ռուսաստանի վարած քաղաքականությունը չի փոխվի:
Նրա ընդդիմախոս, ԱԻՄ նախագահ Պարույր Հայրիկյանն էլ նշեց, թե իրեն չի հետաքրքրում, թե ով ում դեմ է, նա կարևորում է այդ մարդու քաղաքականությունը: Հայրիկյանը նկատեց, որ մեզանում քաղաքական գործիչները քաղաքականապես ձախողվելուց հետո մի քանի տարի «քնում-հանգստանում են» և հետո նորից գալիս են ասպարեզ: Որպես օրինակ նա բերեց Կարեն Դեմիրճյանի և Լևոն Տեր-Պետրոսյանի վերադարձը: «Ինչ վերաբերում է Քոչարյանին, ապա նա վերադառնում է որպես անձ, ոչ թե կուսակցությամբ: Ես նախատրամադրված եմ Քոչարյանի դեմ՝ Մարտի 1-ի պատճառով, և դրա համար հնարավոր է, որ անաչառ չլինեմ նրան գնահատելիս», – ասաց Հայրիկյանը:
Հայրիկյանը նաև հիշեց, թե ինչպես է Քոչարյանը փակել ԱԻՄ-ի գրասենյակները. «Ճիշտ է՝ նա ասում էր, որ Անդրանիկ Մարգարյանն է արել, բայց Մարգարյանն առանց Քոչարյանի թույլտվության չէր էլ փռշտում»:
