Հայ ազգային կոնգրեսի ամերիկյան գրասենյակը հայտարարություն է տարածել, որում ասված է.
«Չորս տարի անընդմեջ դուք զրականքների գնով պայքարում եք Հայաստանում սահմանադրական կարգի և ձեր ոտնահարված իրավունքների վերականգնման համար: Չորս տարի անընդմեջ իշխանություններին չի հաջողվել կոտրել ձեր աննկուն կամքը, լռեցնել ձեզ ո’չ աննախադեպ բռնությամբ, ո’չ հետապնդումներով ու սպառնալիքներով: Պատահական չէ, որ անկախության 20-ամյակին դուք նորից Ազատության հրապարակում եք, քանի որ 20 տարի առաջ դուք ստանձնել եք ոչ միայն Հայաստան երկրի ու սեփական ճակատագիրը կերտելու, այլև սեփական երկրին տերը կանգնելու պատասխանատվությունը:
Այսօր Ազատության հրապարակը Հայաստանի Հանրապետության, սեփական ընտանիքի ու զավակի ապագայով մտահոգ արժանապատիվ ու պահանջատեր քաղաքացիների տունն է ու հարթակը, իսկ ձեր մասնակցությունը` Հայաստանի առաջընթացի ու զարգացման միակ գրավականը: Իշխանությունները շարունակում են կիրառել ձեզ պատժելու, ձեր ձայնը լռեցնելու իրենց ծանոթ բոլոր միջոցները, ավելին այսօր նրանք չեն խորշում ձեր դեմ պայքարել առավել ստոր և նենգաբարո հնարքներով: Բայց հայ ժողովրդի «տառապանքը փորձ ունի», և դուք այս փորձությանն էլ կդիմանաք:
Ամերիկահայությունը ձեր կողքին է և միշտ ձեր կողքին կլինի քանի դեռ Հայաստանում չի վերականգնվել սահմանադրական կարգը, քանի դեռ Հայաստանում չի ձևավորվել օրինակարգ իշխանություն, քանի դեռ Հայաստանի ժողովուրդը պայքարում է ապահով, բարեկեցիկ ու իրավական պետությունում ապրելու իր իրավունքների համար:
