«Շատ գրողներ կան, որ ընդհանրապես չեն մասնակցում կամ հեռու են պահում իրենց այն ամենից, ինչ ներկայում կատարվում է, գրողներ էլ կան, որ հիմա էլ Ազատության հրապարակում են: Կան մարդիկ, որ ողջունում են, կան, որ անտարբեր են, կան, որ մտածում են, որ այդ ճանապարհով դժվար ռեալ բան փոխվի»,- «Առաջին լրատվական»-ի հետ զրույցում ասաց արձակագիր Արամ Պաչյանը` վերլուծելով գրողների դիրքորոշումը:
Նրա խոսքով` հեղափոխությունն անհրաժեշտություն է, քանի որ ստեղծվել է ոստիկանական, տոտալիտար մի համակարգ: «Թե ինչ ճանապարհով կլինի, չեմ կարող ասել, բայց այն պարտադիր է, քանի որ այս երկրում ամեն ինչ իրականում վերջացած է: Եթե իշխանությունները չհեռանան, մենք ապագա չունենք՝ այս երկրում դեմոկրատական արժեքներին հասնելու համար», – նշեց Ա.Պաչյանը` կարևորելով ու որպես ելք տեսնելով օրինական ընտրությունների անցկացումը, որ գոնե հույսի լույս կարողանանք նշմարել:
Այս իշխանությունները, ըստ գրողի, պարտադիր պետք է հեռանան, քանի որ երկրի կարգավորման այլ ուղիներ ինքը չի տեսնում, սակայն նրանք ոչ մի կերպ չեն ցանկանում թողնել իրենց պաշտոնը ու դիրքերը:
