«Ժողովրդական կուսակցության» ղեկավար Տիգրան Կարապետյանն «Առաջին լրատվական»-ի հետ զրույցում ողջունում է Հայ ազգային կոնգրեսի` Ազատության հրապարակում շուրջօրյա հանրահավաքներ անցկացնելու գաղափարը, սակայն կարծում է, որ նախապես հայտարարված 7 օրը քիչ է՝ շոշափելի արդյունքների հասնելու համար:
«Ամեն ինչ ճիշտ է մտածված` բացառությամբ հանրահավաքների համար ժամկետներ սահմանելը: Հայ ազգային կոնգրեսը դրանք պետք է անցկացներ ոչ թե մեկ շաբաթով, այլ անժամկետ: Ժողովուրդը դժգոհ և խղճուկ վիճակում է, իսկ անհատները շարունակում են հարստանալ: Այսպես երկար շարունակվել չի կարող»,- համոզմունք հայտնեց Կարապետյանը:
Հարցին` կարո՞ղ է Ազատության հրապարակում հավաքված մարդկանց մոտ դժգոհության ալիք բարձրանալ, որն էլ նրանց կստիպի անժամկետ նստացույց հայտարարել, «Ժողովրդական կուսակցության» առաջնորդն ասաց. «Իհարկե, չեմ բացառում»:
Հիշեցնենք, որ ՀԱԿ-ը հոկտեմբերի 30-ից Ազատության հրապարակում մեկշաբաթյա շուրջօրյա հանրահավաքներ է հայտարարել:
