ՀՀ ոստիկանության տարածած հաղորդագրությունը արվել է հետագա անօրինական քայլերի օրինականությունն ապահովելու համար: «Առաջին լրատվականի» հետ զրույցում նման տեսակետ հայտնեց իրավապաշտպան Միքայել Դանիելյանը` մեկնաբանելով երեկ ՀՀ ոստիկանության տարածած հաղորդագրությունը, որում ասված էր, որ ոստիկանությունը կցրի նստացույցի մասնակիցներին, քանի որ հանրահավաքները և նստացույցը անօրինական են: Նաև նշված էր, որ ձեռնամուխ կլինեն գործողությունների հասարակական կարգի և այլոց իրավունքների անհամաչափ խախտման պարագայում: Տեղեկացնենք, որ սեպտեմբերի 30-ի ՀԱԿ հանրահավաքից հետո որոշվել է շուրջօրյա հանրահավաքներ և նստացույց անցկացնել:
«Ոստիկանությունը միշտ անում է քայլեր, որպեսզի վախ սերմանի ցուցարարների մեջ և ստիպի նրանց հեռանալ Ազատության հրապարակից: Նրանք արգելելու իրավունք չունեն, այլ փորձում են մթնոլորտը շիկացնել, այս պահին իրենց մոտ հաջողվել է, իրենց այդպիսի հրաման է եկել»,- նշեց իրավապաշտպանը` մեկնաբանելով, որ սա արվում է նրա համար, որ եթե որոշում կայացվի ցրել և ուժ գործադրել, ոստիկանությունը արդարացում ունենա` չնայած այնտեղ խաղաղ հանրահավաք է անցնում, ոչ ոք անիրավաչափ գործողություն չի անում և վրաններ հանելու պահանջը անհեթեթ է, դրանք չեն խանգարում այլոց սահմանադրական իրավունքին:
Ըստ Մ. Դանիելյանի`սա նախազգուշացնում է, որ հետո լինեն բռնի գործողություններ, արդարացում լինի, ինչպես արվել է 2008թ մարտի 1-ին: «Ինչ սահմանադրական նորմի մասին է խոսքը, եթե խաղաղ ցույց է իրականացվում, ամեն ինչ նորմալ է, խաղաղ: Եթե մի քանի վրան է դրված ում է դա խանգարում, ոչ մի սահմանադրական իրավունքի խախտման մասին խոսք լինել չի կարող: Սրանով ապահովում են իրենց հետագա գործողությունները»,- ընդգծեց իրավապաշտպանը: