Հնդկաստանի կենտրոնական Մադխիա-Պրադեշ նահանգում գովազդ է նկարահանվել, որի հեղինակները փորձում են համոզել հնդիկներին, թե որքան լավ է աղջիկ ունենալը: Ինչպես հաղորդում է Agence France-Presse գործակալությունը, գովազդային արշավը, որը ամբողջ էջեր է զբաղեցնում խոշոր թերթերում, հնդիկներին պատմում է, որ «աղջիկները կյանքում օգուտ են բերում»: Գունավոր գովազդային պոստերների վրա պատկերված է նահանգի գլխավոր նախարարներից մեկը` աղջիկ երեխա գրկած: Գովազդն ուղեկցվում է «Նրանք մեր կյանքը ժպիտով են լցնում: Նրանք ի վիճակի են ամեն ինչ անել» մակագրությամբ:
«Փրկեք մեր աղջիկներին» գովազդային արշավն ամբողջությամբ կմեկնարկի հոկտեմբերի 5-ին:
Գովազդային արշավի նպատակն է վերականգնել երկրում խախտված գենդերային հարաբերակցությունը: Հնդիկների` աղջիկ երեխա չունենալու ցանկությունը հանգեցրել է աբորտների և երեխաների սպանությունների թվի աճին: Այժմ հնդիկներին արգելված է նախօրոք իմանալ երեխայի սեռը:
Ինչպես գրում է The Economic Times-ը, 2011 թ. մարտին հրապարակված վիճակագրության համաձայն՝ աղջիկների և տղաների հարաբերակցությունը հասել է 1947 թվից հետո ամենացածր ցուցանիշին: Այժմ Հնդկաստանում 1000 տղա երեխային բաժին է ընկնում 914 աղջիկ երեխա:
Ավանդույթի համաձայն՝ աղջիկները Հնդկաստանում բեռ են համարվում ընտանիքի համար, քանի որ նրանց համար պետք է մեծ օժիտ պատրաստել: Մինչդեռ տղաներին դիտում են որպես ընտանիքի ապագա ղեկավար, որոնք կարող են հոգ տանել ծերացած ծնողների մասին:
