Ռուսական Коммерсантъ թերթի փոխանցմամբ՝ Թուրքիայի էներգետիկայի ու բնական պաշարների նախարար Թաներ Յըլդըզը երեկ հայտարարել է, որ Անկարան կարող է չերկարաձգել 25 տարի առաջ Ռուսաստանի հետ կնքած և ներկայումս գործող գազային համաձայնագիրը, եթե Մոսկվան չվերանայի գազի գինը։
Թուրքիան ռուսական գազի երկրորդ խոշոր ներկրողն է (Ուկրաինայից հետո) և ռուսական գազի գնի իջեցման հարցը բարձրացրել է նաև նախկինում։ Այդ հարցը քննարկվել է այս տարվա մարտին Մոսկվայում Ռուսաստանի նախագահ Դմիտրի Մեդվեդևի և Թուրքիայի վարչապետ Էրդողանի միջև տեղի ունեցած հանդիպման ժամանակ։ Սակայն այն ժամանակ չէր հաջողվել պայմանավորվածություն ձեռք բերել տվյալ հարցում։
Յըլդըզի երեկվա հայտարարության մեջ ուշագրավն այն է, որ Թուրքիան առաջին անգամ է հայտարարում Ռուսաստանի հետ գազային համաձայնագրի չերկարաձգման և ռուսական գազի ներկրման ծավալի կրճատման մասին։ Ներկայումս Թուրքիան գտնվում է չափազանց շահեկան վիճակում. Անկարայի որոշումից է կախված Ռուսաստանի համար առաջնահերթ նշանակություն ունեցող «Հարավային հոսք» գազատարի կառուցումը։
Թուրքիան ցայժմ չի թույլատրել եվրոպական Nabucco գազատարի մրցակից հանդիսացող այդ խողովակաշարի՝ սեփական ջրերով անցկացումը։ Բացի այդ, փաստացիորեն Միջին Ասիայից, Ադրբեջանից ու Իրանից դեպի Եվրոպա գազի փոխադրման բոլոր հեռանկարային երթուղիները կապված են Թուրքիայի հետ։
Независимая газета-ի վերլուծաբանները կարծում են, որ պաշտոնական Անկարան շատ հարմար ժամանակ է ընտրել ռուսական «Գազպրոմ»-ին հարված հասցնելու համար՝ հաշվի առնելով ոչ վաղ անցյալում «Գազպրոմ»-ի եվրոպական դուստր ընկերություններում Եվրահանձնաժողովի իրականացրած ստուգումները։ Նրանք կարծում են, որ Թուրքիան օգնում է ԵՄ-ին ռուսական գազային մենատիրության թուլացման հարցում, և որ Եվրահանձնաժողովի իրականացրած ստուգումների ու թուրքական գազային դեմարշի ժամկետների համընկնումը պատահական չէր։
Հիշեցնենք, որ ներկայումս Ռուսաստանը Թուրքիային գազ է մատակարարում երկու խողովակաշարով՝ «Արևմտյան» (դեպի Ստամբուլ) և «Երկնագույն հոսք» (Սև ծովով)։
