Փոխադարձության սկզբունքով ԱՄՆ նոր մաքսատուրքերը չեն շրջանցել նաև Հայաստանից, Վրաստանից ու Ադրբեջանից ներկրվող ապրանքները։ Երեք երկրի դեպքում էլ 10-ական % աճ է։
Դոնալդ Թրամփը հայտարարել է համաշխարհային առևտրային պատերազմի մեկնարկի մասին՝ ավելի քան երկու ամիս նախապատրաստվելով իր երկրորդ նախագահական ժամկետի գլխավոր իրադարձությանը։ Սպիտակ տան Վարդերի այգում կազմակերպված հանդիսավոր արարողության ընթացքում նա ապրիլի 2-ը հռչակել է Ամերիկայի «Ազատագրման օր» և հայտարարել, որ սահմանում է համընդհանուր մաքսատուրքեր՝ աննախադեպ բարձր չափերով, որոնք ԱՄՆ-ում վերջին անգամ կիրառվել են նախորդ դարի սկզբին։
Թրամփը վստահ է, որ առևտրային սահմանափակումները կստիպեն ինչպես դաշնակիցներին, այնպես էլ հակառակորդներին գնալ զիջումների՝ թե՛ ֆինանսական, թե՛ տարածքային։ Սակայն տնտեսագետները զգուշացնում են, որ այս որոշման հետևանքով կյանքն ավելի բարդ է դառնալու բոլորի, այդ թվում՝ հենց ամերիկացիների համար, որոնք իրենք են վճարելու Թրամփի սահմանած ներմուծման հարկը։
«Այսօր Ազատագրման օրն է, – հայտարարել է Թրամփը։ – Սա Ամերիկայի պատմության ամենակարևոր օրերից է, մեր տնտեսական անկախության հռչակագիրը»։
«Մենք կրկին Ամերիկան մեծ ու հզոր կդարձնենք։ Մեր երկիրը ավելի քան 50 տարի թալանում էին։ Դա այլևս չի կրկնվի»։
Թրամփը հրամանագրով սահմանել է «փոխադարձ» մաքսատուրքեր՝ 34% Չինաստանի, 20% Եվրոպական Միության, 24% Ճապոնիայի և 26% Հնդկաստանի նկատմամբ։
Ընդհանուր առմամբ, որևէ երկիր չի խուսափի ամերիկացիներից իր ապրանքների վաճառքի դիմաց մաքսատուրք վճարելուց։ «Հիմնական նվազագույն մաքսատուրք» սահմանվել է 10%։ Ընդհանուր մաքսատուրքերը ուժի մեջ կմտնեն ապրիլի 5-ից, իսկ առավել բարձր դրույքաչափերը՝ ապրիլի 9-ից։
