ԱԱԾ-ի՝ աղմուկ հանած գաղտնալսումների գործը Առաջին ատյանի դատարանում մոտենում է իր տրամաբանական ավարտին: Հիշեցնենք, որ, ըստ անցյալ տարի մամուլում հրապարակված տեղեկությունների, Սերժ Սարգսյանի թիկունքում պատվերով գաղտնալսումներ էին արվել, և ԱԱԾ-ից այդ հեռախոսային վերծանումները վաճառել էին ինչ-որ օլիգարխների ու փողատերերի: Այսինքն, ԱԱԾ-ն ինֆորմացիա էր վաճառել: Իսկ այդ ամենը Սերժ Սարգսյանին հայտնի էր դարձել Ռոստովում, որտեղ նա հանդիպել էր Կրասնոդարից ժամանած ինչ-որ անձանց: Նրանք էլ գլխի էին գցել, որ իր թիկունքում Հայաստանի ԱԱԾ բարձրաստիճան պաշտոնյաները և մյուս ուժային կառույցների որոշ ներկայացուցիչներ տարիներ շարունակ պատվերով են աշխատել` օգտագործելով իրենց պաշտոնեական լծակները:
Իսկ իրավապահ համակարգերի որոշ անձանց միջև կապը կոորդինացրել էր ԱԱԾ պետի նախկին տեղակալ Հրաչյա Հարությունյանը (Կրակեմ Հրաչ): Նշվել էր նաև, որ այդ խումբը նաև մի շարք հանցագործություններ էր հովանավորել` գողություններ և այլն: Մամուլում շրջանառված տեղեկությունների համաձայն` գաղտնալսումների հետ կապված ԱԱԾ-ում նաև ներքին ծառայողական քննություն էր անցկացվել, ինչը համընկել էր Հրաչյա Հարությունյանին ԱԱԾ պետի առաջին տեղակալի պաշտոնից ազատելու և ՊՊԾ պետի պաշտոնում նշանակելու հետ: Կարծիք կար, որ նրան պարզապես ԱԱԾ համակարգից շատ զգուշորեն մեկուսացրել են, որպեսզի պարզեն, թե մի շարք պաշտոնյաների հեռախոսային խոսակցությունների գաղտնալսումների վերծանումները վաճառվե՞լ են ազդեցիկ ինչ-որ անձանց և օլիգարխների, թե՞ ոչ: Հնարավոր էր համարվում, որ ծառայողական քննության արդյունքում ԱԱԾ, ուժային և հարկային մարմինների մի շարք պաշտոնյաներ կարող են ազատվել զբաղեցրած պաշտոններից և նույնիսկ դատապարտվել՝ նախագահի թիկունքում հայրենի օլիգարխների և քրեական տարրերի հետ ինչ-ինչ քրեական և ֆինանսական համաձայնությունների գալու և տարիներ շարունակ փոխշահավետ «գործարքներ» կնքելու համար:
Դատավարության ընթացքում դռնփակ դատական նիստեր են եղել, որոնց ընթացքում կարևոր վկաներ են հարցաքննվել: Թե ովքեր են նրանք եղել և ինչ կարևոր հարցեր են փորձել պարզել նրանց միջոցով` դեռ հայտնի չէ: Բայց կարելի է ենթադրել, որ նրանցից պետք է պարզվեր, թե ով ում, ինչ գումարի դիմաց է գաղտնալսել և ում է տվել այդ ինֆորմացիան. շղթան պետք է բացահայտվեր, և շատ մարդիկ կարող էին հայտնվել ճաղերի հետևում: Բայց դա տեղի չունեցավ կամ գուցե տեղի ունեցավ շատ անաղմուկ, քանի որ պետական, ԱԱԾ գաղտնիքի հետ գործ ունեին: Մեր ունեցած տեղեկություններով` այս գործով միակ ամբաստանյալը մնում է Արմեն Տեր-Մինասյանը:
Վերջինս մեղադրվում է այն բանի համար, որ, աշխատելով ՀՀ ԱԱԾ հակահետախուզության գլխավոր վարչության 4-րդ բաժնում՝ որպես պետի տեղակալ, նախնական համաձայնության գալով Ռոբերտ Չիլինգարյանի հետ՝ Ռոբերտ Լաիշյանի օգտին ակնհայտ ապօրինի անգործության համար, նրանից անձամբ ստացել է առանձնապես խոշոր չափերի կաշառք: Իսկ թե այդ և գուցե մյուս կաշառքներն ինչպես են բաշխվել Ա. Տեր-Մինասյանի և նրա հնարավոր գործընկերների միջև, հավանաբար հայտնի կդառնա ավելի ուշ: Համենայնդեպս, նույնիսկ երեխան է հասկանում, որ Հայաստանում նման գործերն առանց հովանավորների չեն իրականացվում: