Մինչ օրս լիովին ապացուցված չեն սեռական խանգարումների առաջացման պատճառները: Կարող է դեր ունենալ գենետիկան, թեև որոշ մասնագետներ չեն ընդունում այդ տեսակետը` ասելով, թե երեխան մաքուր է ծնվում և հետագայում են նրա մոտ առաջանում որոշակի խնդիրներ. «Առաջին լրատվական»-ի հետ զրույցում այսպիսի կարծիք արտահայտեց հոգեբան Մարտին Վարդանյանը: Նրա խոսքով` բնությունը միշտ պահում է ներդաշնակությունը, և եթե կնոջ մոտ, օրինակ, չափից դուրս է լինում կանացիությունը, նրա սերնդի մեջ դա բացակայում է, և հակառակը:
Ինչ վերաբերում է շեղումներին, ապա դրանք, ըստ մասնագետի, կարող են առաջանալ հղիության ժամանակ հորմոնների ոչ ճիշտ տեղաշարժման, երեխայի սխալ դաստիարակության հետևանքով:
Հարցին` արդյո՞ք մեզանում ճիշտ է տարվում երեխայի սեռական դաստիարակությունը, վերջիս պատասխանեց`«շատ սխալ է տարվում»:
«Ծնողները հեռու են հոգեբանությունից, չգիտեն ինչպես վարվել, և այս պարագայում նրա համար օրինակ կարող է դառնալ մեկը, որը չի համապատասխանում որպես այդ սեռի ներկայացուցիչ»,- նշեց հոգեբանը` ընդգծելով, որ երեխաները 3-6 տարեկան հասակում ընդօրինակում են այն ամենը, ինչ տեսնում են:
Ըստ նրա` եթե ընտանիքում մայրը չկա, ընդօրինակում են հորը, եթե հայրը չկա` մորը, ինչը մեր հասարակությունում բաց է: «Ընտանիքի նոր մոդել է ի հայտ եկել.շատ կանայք ցանկանում են երեխա ունենալ, և նրանց ամուսին պետք չէ»,- ասաց նա` հավելելով, թե, ուսումնասիրությունների համաձայն, այդ երեխաների 99 տոկոսը հետագայում ունենալու է սեռական բնույթի խնդիրներ:
