Մենք դեմոկրատական հեղափոխություն ենք ակնկալում: Այսօր «Առաջին լրատվական»-ի հետ զրույցում, խոսելով ՀԱԿ վերջին հանրահավաքում հնչած կոչի մասին, ասաց ՍԴՀԿ ատենապետ Լյուդմիլա Սարգսյանը: Սեպտեմբերի 23-ին ՀԱԿ հանրահավաքի մասնակիցներին հանձնարարվեց հաջորդ հանրահավաքին իրենց հետ բերել ևս 5 քաղաքացու: «Դա գիտակցական կոչ, հորդոր, աղերսանք էր ժողովրդին, որ եթե դուք իրոք ուզում եք մնալ մեր երկրում, ապրել, ստեղծագործել և ապագա կերտել, ապա բարի եղեք ներկայանալ ամսի 30-ի հանրահավաքին, և բոլոր այն պահանջները, որ դուք հետապնդում եք, ձեր իսկ օգնությամբ լուծվելու են»: Սա էր այդ կոչի բովանդակությունը:
Մինչև ժողովուրդը չհամախմբվի և պահանջներ չներկայացնի, երկրում բարեփոխում ակնկալել անհնար է: Արդյունքում կունենանք այն, ինչ ակնկալու ենք. կվերականգնվի մեր սահմանադրական կարգը, կլուծվեն սոցիալական խնդիրները, և ժողովուրդը՝ որպես գիտակից քաղաքացի, կձևավորի իշխանություն, որին հնարավորություն կունենա վերահսկելու»,- մեկնաբանեց Լ. Սարգսյանը` հավաստիացնելով, որ երբ հավաքվում է մարդկանց բազմությունը, ապա ոչ մի քաղաքական ուժ և իշխանություն դիմակայել չի կարող, առավել ևս, երբ իրենք չեն պատրաստվում ապստամբություն իրականացնել: «Մենք դեմոկրատական հեղափոխություն ենք ցանկանում իրականացնել Հայաստանում, և դա նշանակում է, ժողովրդի ակտիվ ճնշման արդյունքում, պարտադրել իշխանություններին արտահերթ ընտրություններ»,- ասաց Լ. Սարգսյանը:
Նա նաև նշեց, որ այս ամենը հնարավոր կլինի, եթե հավաքվի այն ժողովուրդը, որը պատրաստ է առաջամարտիկ լինել: Նրա խոսքով` ժողովուրդը պետք է ներկա լինի, կոնկրետ պահանջներով հանդես գա, և նրա ներկայությունը շատ մեծաքանակ պետք է լինի, ինչը կարող է ազդել իշխանությունների որոշումների վրա, եթե այս դեպքում իշխանություններն անհաղորդ մնան, շատ տխուր և անվերահսկելի վիճակ կստեղծվի: «Պետք է գիտակցել, որ անվերահսկելի հասարակության դեպքում իշխանությունը վտանգված է»,- ընդգծեց ՍԴՀԿ ատենապետ Լյուդմիլա Սարգսյանը:
Անդրադառնալով ներկայիս վիճակին` նա ասաց, որ մեր երկիրը հայտնվել է մի իրավիճակում, երբ կամ ժողովրդի հաղթանակը պիտի տոնվի, կամ էլ այդ ժողովուրդը պետք է երկիրը լքի: «Եվ այս վիճակն այսպես շարունակել այլևս անհնար է, հետևաբար կարծում եմ, որ այս վիճակի պահպանման դեպքում այն արտագաղթը, որ այսօր տեղի է ունենում, ամիսների ընթացքում դառնալու է վտանգավոր մի երևույթ և սպառնալու է մեր երկրի անվտանգությանը, հետևաբար, մենք ժամանակ չունենք»,- մեկնաբանեց Լ. Սարգսյանը: