Նիկոլ Փաշինյանը հերթական հոդվածն է հրապարակել «Արմենպրես» պետական գործակալության միջոցով, որը վերաբերում է հաղորդուղիների ապաշրջափակման թեմային: Հոդվածում Փաշինյանը մատնացույց է անում ապաշրջափակման հարցում Հայաստանի առաջարկած տարբերակները, իհարկե, առանց դետալային մանրամասների և նշում, որ ապաշրջափակման հարցը, ըստ էության լուծված է՝ բացառությամբ Ադրբեջանի համաձայնության: Նիկոլ Փաշինյանը հարց է տալիս, թե ինչո՞ւ է Բաքուն մերժում Հայաստանի առաջարկները:
«Հույս ունեմ՝ ոչ էսկալացիայի կեղծ առիթ կառուցելու համար»,- գրում է Նիկոլ Փաշինյանը: Իհարկե, պակաս էական հարց չէ և այն, թե ինչո՞ւ է Նիկոլ Փաշինյանը գրում վերջին մեկ ամսվա ընթացքում արդեն երկրորդ հոդվածը այս թեմայով: Դա նախաձեռնողականությո՞ւն է, թե՞ մտահոգություն և տագնապ, որ Ադրբեջանը հասունացնում է էսկալացիա:
Նիկոլ Փաշինյանն օրեր առաջ էր հայտարարել, որ չկա էսկալացիայի որևէ պատճառ: ՔՊ հետ փակ հանդիպման վերաբերյալ էլ մամուլի հրապարակումների համաձայն Փաշինյանը դարձյալ նշել էր, որ չկա էսկալացիայի վտանգ: Մինչդեռ Նիկոլ Փաշինյանը «Արմենպրես»-ում էսկալացիայի մոտիվի թեմայով մի հոդված հրապարակել էր փետրվարի 9-ին՝ Վաշինգտոն այցից վերադարձից հետո և Փարիզ կատարելիք այցի շեմին, և հիմա էլ՝ մարտի 4-ին հոդված է գրում հաղորդուղիների ապաշրջափակման մասին, որն իր տողատակում, ըստ էության, դարձյալ էսկալացիայի մոտիվի մասին է:
Իսկ հնարավո՞ր է, որ հոդվածի միջոցով Նիկոլ Փաշինյանը լուծում է այլ խնդիր՝ Հայաստանի հանրության տրամադրությունների շոշափում: Վարչապետ Փաշինյանը հոդվածում մատնացույց է անում ճանապարհների ապաշրջափակման մի քանի տարբերակներ, իհարկե ոչ դետալային մանրամասներով, այդուհանդերձ ընդհանուր որոշակի նկարագրությամբ: ՉԻ բացառվում, որ հոդվածն ավելի շուտ առիթ է դրանք բարձրաձայնելու և հանրային տրամադրությունները շոշափելու համար: Թեև դրանք կարող են լինել զուգահեռ նպատակներ՝ մի կողմից ցույց տալ, որ Հայաստանն առավելագույնն է արել և անում հաղորդուղիների ապաշրջափակման համար, հետևաբար ապակառուցողական Ադրբեջանն է, իսկ մյուս կողմից շոշափել հանրային տրամադրություններ, հասկանալու համար, թե քաղաքական որոշում կայացնելու ի՞նչ պոտենցիալ կամ հնարավորություն ունի ինքը:
Հնարավոր է նաև, որ Փաշինյանը ձևավորում է իր նախընտրական օրակարգը: Իհարկե, ուշադրության արժանի է նաև ժամանակացույցը, միջազգային իրադարձությունների համեմատությամբ: Հայաստանի վարչապետի հոդվածը հրապարակվում է ԱՄՆ-Ռուսաստան երկխոսության ծավալման ֆոնին՝ ԱՄՆ-Եվրոպա կամ ԱՄՆ-Բրիտանիա դիմակայության դրսևորմանը զուգահեռ, ինչպես նաև ՌԴ արտգործնախարար Լավրովի՝ Անկարա և Թեհրան կատարած այցերից հետո, որին զուգահեռ էլ Ժնևում տեղի էր ունեցել Հայաստանի ԱԳ նախարարի և հանդիպում Իրանի ԱԳ նախարարի հետ:
