ԱՄՆ Մասաչուսեթս նահանգում ձերբակալվել է այդ երկրի 26-ամյա քաղաքացի, որը մեղադրվում է ահաբեկչություններ նախապատրաստելու մեջ: Ըստ ԱՄՆ իշխանությունների` հարձակման թիրախ պետք է դառնային Պենտագոնն ու Կոնգրեսի շենքը Վաշինգտոնում, իսկ դրա համար օգտագործվելու էին ինքնաթիռներ: Այս մասին հաղորդում է France Presse գործակալությունը:
Ինչպես մանրամասնել է Reuters գործակալությունը, Ռազվան Ֆիրդաուսը պատրաստվում էր օգտագործել անօդաչու թռչող սարքեր, որոնց վրա պայթուցիկներ էին տեղադրվելու: Բացի այդ, նա պատրաստվում էր պայթուցիկ մատակարարել «Ալ-Քաիդա»-ին Իրաքում ` ամերիկյան զինվորների դեմ օգտագործելու համար: Ֆիրդաուսին արդեն առաջադրվել է պաշտոնական մեղադրանք:
Նահանգի դատախազ Կարմեն Օրթիզն ասել է, որ ահաբեկչի ձերբակալությունը հնարավոր է դարձել Հետաքննությունների դաշնային բյուրոյի հմուտ աշխատանքի շնորհիվ, երբ դրա աշխատակիցները հանդես են եկել որպես Ֆիրդաուսի «գործընկերներ»: Նշվել է նաև, որ բնակչությանը հետաքննության ժամանակ ոչ մի վնաս չի սպառնացել, քանի որ մեղադրյալի բոլոր քայլերը վերահսկվել են իրավապահների կողմից: