«Ազատություն» ռադիոկայանի հայկական ծառայության հետ բացառիկ հարցազրույցում Վրաստանի ընդդիմության առաջնորդներից մեկը համարվող «Ազատ դեմոկրատներ» կուսակցության ղեկավար Իրակլի Ալասանիան հայտարարել է, որ Հարավային Կովկասը մի օր պետք է վերածվի տնտեսական և քաղաքական մի ընդհանրության, և այդ համատեքստում Վրաստանը պետք է դառնա համաձայնեցման, հաշտեցման, այլ ոչ թե առճակատման վայր։
Ըստ Ալասանիայի, ով նախկինում իր երկրի դեսպանն է եղել ՄԱԿ-ում, Վրաստանի համար եվրոպական ինտեգրացիան առաջնահերթություն է, սակայն դա «կարևոր ու հնարավոր է նաև հարավկովկասյան մյուս երկրների համար». «Մենք դա պետք է անենք համագործակցաբար ու միասին` վերստին միմյանց ճանաչելու, խոսելու և շփվելու ճանապարհով: Նույն համագործակցության ոգով էլ հարկ է առաջնորդվել գերտերությունների հետ հարաբերությունները կառուցելիս»:
Ընդդիմադիր գործիչը քննադատել է Վրաստանի ներկայիս իշխանությունների վարած արտաքին քաղաքականությունը. «Կարծում եմ, նախագահ Սաակաշվիլու հիմնական սխալն այն է, որ նա խաղում է գերտերությունների հակասությունների վրա: Մենք պետք է փոխենք այդ մտայնությունը: Դրա համար անհրաժեշտ ռեսուրսը, իմ կարծիքով, կա»:
Ինչ վերաբերում է կոնկրետ հարավկովկասյան երեք պետություններին` Վրաստանին, Հայաստանին ու Ադրբեջանին, ապա, Ալասանիայի խոսքով, եկել է ժամանակը, որպեսզի այս երկրներն իրենց մեջ ուժ գտնեն հաղթահարելու «80-ականներին ու 90-ականներին բնորոշ անվստահության շրջանն» ու, իրերը ճիշտ գնահատելով, ուղղակի խոստովանեն, որ տարածաշրջանային անվտանգության ու համագործակցության ապագան մեր ձեռքերում է: «Ո՛չ ԱՄՆ-ը, ո՛չ Բրյուսելը, ո՛չ Մոսկվան, ո՛չ Թուրքիան դա չեն ապահովի»,- հավելել է նա:
Անդրադառնալով հարավկովկասյան հակամարտություններին` Իրակլի Ալասանիան համոզմունք է հայտնել, որ դրանք, «մարդկային տառապանքներ ու ցավ բերելուց բացի, բացարձակապես որևէ խնդիր չլուծեցին». «Մի հարցում համոզված եմ` ինչպես ղարաբաղյան, այնպես էլ վրաց-աբխազական ու վրաց-հարավօսական հակամարտությունները ռազմական լուծում չունեն»:
