Ադրբեջանական APA լրատվական գործակալության փոխանցմամբ՝ Ադրբեջանում ԱՄՆ դեսպան Մեթյու Բրայզան անդրադարձել է «Անդրկասպյան» գազատարի կառուցման հիմնախնդրին.
«ԱՄՆ-ը շահագրգռված է տվյալ նախագծով, քանի որ դրանով նա լուծում է մի շարք ռազմավարական նպատակներ։ «Անդրկասպյան» գազատարի նախագծի կյանքի կոչումը կախված է միայն Ադրբեջանից և Թուրքմենստանից, և ոչ ոք չի կարող միջամտել այդ հարցին։
Տվյալ նախագծի հետ կապված՝ ԱՄՆ-ը աջակցում է Ադրբեջանին, երկու երկրներն էլ ռազմավարական շահեր ունեն տվյալ հարցում։ Խողովակաշարի հաջողությունը կախված է տնտեսական և քաղաքական հարցերից։
«Հարավային միջանցք»-ը զարգացում է ապրելու՝ անկախ նրանից, թե որ նախագիծն (Nabucco, ITGI, TAP) է ընտրվելու»։
Հիշեցնենք, որ այս տարվա սեպտեմբերի 7-ին ԵՄ-ը «Անդրկասպյան» գազատարի վերաբերյալ իրավական բազայի ստեղծման նպատակով Ադրբեջանի և Թուրքմենստանի հետ բանակցություններ վարելու մանդատ է տրամադրել Եվրահանձնաժողովին։
Սակայն զգալի քանակությամբ գազային պաշարներով օժտված Ռուսաստանն ու Իրանը դեմ են Կասպից ծովի հատակով ամեն տիպի խողովակաշարերի անցկացմանը՝ նախքան Կասպիցի իրավական կարգավիճակ (ծով կամ լիճ) ստանալու հարցի լուծումը։
Ի դեպ, Թուրքմենստանի գազային պաշարների արտահանման համար նախատեսված «Անդրկասպյան» գազատարի կառուցման գաղափարը հղացել է ԱՄՆ-ը 1996 թվականին։ Այն թուրքմենական գազը Կասպիցի հատակով հասցնելու է մինչև Ադրբեջան, որտեղից էլ Nabucco գազատարով՝ Եվրոպա։
