Երևան քաղաքում պետք է կտրուկ պակասեցվի միկրոավտոբուսների քանակը՝ փոխարենը զարգացնելով էլէկտրատրանսպորտը: Այս մասին «Առաջին լրատվական»-ի հետ զրույցում նշեց «Սպառողների ասոցիացիա» ՀԿ-ի նախագահ Արմեն Պողոսյանը: «Էլեկտրատրանսպորտի զարգացման փաստարկները հետևյալն են. էլեկտրաէներգիան մեզանում չափից ավել շատ է, այսինքն` մենք ներկրում ենք բենզին կամ գազ օվկիանոսից այն կողմից, կատարում ենք ծախս, իսկ տնտեսապես ավելի արդարացված կլինի էլեկտրաէներգիան օգտագործել»,- բացատրում է Արմեն Պողոսյանը:
Նա հունիսի 26-ին բաց նամակ է ուղարկել ՀՀ վարչապետ Տիգրան Սարգսյանին և Երևանի քաղաքապետ Կարեն Կարապետյանին, որում նշել է, որ Երևանի տրանսպորտային ցանցի ներկա վիճակը «չի համապատասխանում ուղևորների նվազագույն պահանջներին և չունի զարգացման հանրօգուտ տեսլական»:
«Այսօր մայրաքաղաքի տրանսպորտային ցանցը ձևավորում են նախ միկրոավտոբուսները, ապա` ավտոբուսները: Ինքնին հասկանալի է, որ միկրոավտոբուսները իրենց տեխնիկական բնութագրով նախատեսված չեն միլիոնանոց քաղաքում ուղևորափոխադրումների համար` հատկապես դրանց ներկայիս բեռնվածությամբ և մաշվածությամբ: Սակայն ավտոբուսային պարկի ավելացումը մենք համարում ենք միայն մասնակի լուծում, քանի որ, նույնիսկ եթե համարենք, որ ավտոբուսներն իրենց աղմկային ֆոնով և հարմարավետությամբ չեն զիջում տրոլեյբուսներին, միևնույն է, դրանք առկա են թողնում տնտեսական և բնապահպանական խնդիրներ»,- ասվում է այդ նամակում:
Ա. Պողոսյանը տեղեկացրեց, որ իրենք պատասխան նամակ են ստացել ՀՀ կապի և տրանսպորտի նախարարի տեղակալից, որում նշվում է, որ միայն քաղաքային էլեկտրատրանսպորտով հնարավոր չէ կազմակերպել ուղևորափոխադրման գործընթացը:
«2007-2008 թթ. ձեռք են բերվել նոր տրոլեյբուսներ, հնարավորության սահմաններում իրականացվել են շահագործման մեջ գտնվող շարժական կազմի վերականգնմանը, ինչպես նաև տրոլեյբուսների շահագործման արդյունավետության բարձրացմանն ուղղված միջոցառումներ: Ելնելով Երևան քաղաքի ռելիեֆային կտրտվածության, բնակչության տրանսպորտային պահանջմունքների լիարժեք բավարարման որակական և քանակական ցուցանիշների ապահովման հանգամանքներից՝ միայն քաղաքային էլեկտրատրանսպորտով հնարավոր չէ կազմակերպել գործընթացը: Միաժամանակ տեղեկացնում եմ, որ, համաձայն տրանսպորտի և դրանց ենթակառուցվածքների զարգացման հայեցակարգային ծրագրերի, հնարավոր կլինի աստիճանաբար ընդլայնել տրոլեյբուսային տնտեսությունը»,- ասված է այդ նամակում:
Ա. Պողոսյանը, սակայն, բավարարված չէ իրենց բաց նամակի այս պատասխանով: Նրա խոսքով` այս ոճով նամակներ ուղարկում էին Հարուն Ալ-Ռաշիդի ժամանակներում: «Նամակի պատասխանը չի բովանդակում մեր հարցերի պատասխանները: Սևով սպիտակի վրա գրված է, որ ներկրվել են տրոլեյբուսներ, և չկա ոչ մի թվային և ժամանակային միավոր: Մենք պետք է համեմատենք, թե այդ ներկրվածները ինչ դեր կունենան ընդհանուր երթևեկության մեջ: Իսկ եթե չկա այդ ցուցանիշը, ուրեմն կոպեկ չարժե այդ նամակը»,- ասաց Ա. Պողոսյանը:
