«Միջազգային շուկայում կաուչուկի գների բարձրացումը մեր երկրի հետ որևէ առնչություն չի ունենա՝ այն պարզ պատճառով, որ եթե նայում ենք դոլարի հաղթարշավը, եվրոյի ու ռուսական ռուբլու անկումը, մեզ մոտ դրամն արժևորվում է: Այսինքն՝ մենք համաշխարհային տնտեսության հետ որևէ կապ չունենք»,- «Առաջին լրատվականի» հետ զրույցում հայտարարեց «Նաիրիտ» գործարանի նախկին տնօրեն Գագիկ Ներսիսյանը՝ մեկնաբանելով այն փաստը, որ կաուչուկի գինը համաշխարհային շուկայում հասել է վերջին 6 ամսում ռեկորդային մակարդակի:
Նրա խոսքով՝ համաշխարհային շուկայում կաուչուկի գները բարձրանում են նավթամթերքի թանկացման պատճառով, սակայն այդ կաուչուկը որևէ կապ չունի ՀՀ արտադրած քլորոպրենային կաուչուկի հետ, որովհետև այլ տեսակի են՝ բնական կամ բնականի անալոգներ:
«Ինչ վերաբերում է քլորոպրենային կաուչուկին, ապա աշխարհում արդեն առնվազն 20 տարի պահանջարկն 80%-ով կրճատված է, որովհետև դրանք փոխարինվել են նոր կաուչուկներով՝ այլ տեսակի, այլ որակական հատկանիշներով»,- ասաց Գ.Ներսիսյանը՝ հավելելով, որ «Դյուպոնը» մեր կաուչուկի նման կաուչուկ արտադրող 7 գործարան է փակել, ինչից հետո դրանք փոխել են արտադրությունը և ուրիշ կաուչուկ են արտադրում:
Գ.Ներսիսյանը նաիրիտցիներին խորհուրդ տվեց ամեն դեպքում կառավարության շենքի մոտ ցույց կազմակերպել՝ գոնե այն պատճառով, որ այս իրավիճակում ղեկավարությունն ամսական 15 հզ. դոլարից ավելի աշխատավարձ է ստացել, իսկ բանվորներն ընդամենը՝ 60-100 հզ. դրամ: Գործարանի նախկին տնօրենը կարծում է, որ պետք է փոխել «Նաիրիտի» արտադրական ուղղությունը, քանի որ որպես կաուչուկ արտադրող՝ այն հեռանկար չունի և, ինչ էլ տեղի ունենա, «Նաիրիտն» արտադրական հզորությունների 10%-ի չափով է գործելու՝ գազի պատճառով. «Եթե բութադիենային կաուչուկի խնդիրը չի լուծվելու, արտադրությունն ավելացնել հնարավոր չի ու միշտ վնասով կլինի: Հնարավոր ներդրողներն էլ շատ լավ հաշվել գիտեն: Առավել ևս դրամն արժևորվում է, և ինչ-որ բան արտահանելն անիմաստ է դառնում: Այսօր այս իշխանությունները «Նաիրիտով» պատրաստ չեն զբաղվել և, կարծում եմ, ոչինչ էլ չեն անի»: