Կալիֆոռնիայի համալսարանի հանրապետական ուսանողները Բերքլիում կկազմակերպեն հացաբուլկեղենի վաճառք, որոնց գները կսահմանեն ըստ գնորդի սեռի և ռասայի: Այս մասին տեղեկանում ենք կազմակերպիչների ֆեյսբուքյան էջից:
Ակցիան կազմակերպվում է որպես բողոքի նշան այն օրինագծի դեմ, որը պետության կողմից ֆինանսավորվող Կալիֆոռնիայի համալսարաններին թույլ է տալիս ուսանողների ընդունելության ժամանակ հաշվի առնել նրանց ռասան, սեռը, էթնիկական պատկանելությունը: Ակցիայի կազմակերպիչների կարծիքով` ընդունելության ժամանակ կիրառվող այս մեթոդները ռասիստական են:
Նման օրինագծի անօրինականությունն ընդգծելու համար հանրապետական ուսանողները տարբեր խմբերի գնորդների համար սահմանել են տարբեր գներ: Ամենաշատը պետք է վճարեն սպիտակները` 2 դոլար, այնուհետև ասիացիները` 1.5 դոլար, իսպանախոս լատինամերիկացիները` 1 դոլար, աֆրոամերիկացիները` 0.75 դոլար, ամերիկյան հնդկացիները` 0.25 դոլար:
Ուսանողներն ընդգծում են, որ օրինագծի ընդունման դեպքում «գունավոր» ամերիկացիները և կանայք ավելի հեշտ կարող են ընդունվել համալսարան, քան սպիտակ տղամարդիկ` անկախ պատրաստվածության աստիճանից:
CNN-ը, վկայակոչելով ակցիայի կազմակերպիչներից մեկին, հաղորդումէ, որ նրանց հասցեին սպառնալիքներ են հնչել:
Այսպես կոչված «դրական խտրականության» կողմնակիցները, որի դեմ հանդես են գալիս ուսանողները, պնդում են, որ նախկինում խտրականության ենթարկված խմբերը (աֆրոամերիկացիներ, հնդկացիներ, կանայք) այժմ պետք է առավելություն ստանան:
