Մոտ 60 հույն ուսանողներ, որոնք ուսանողական շարժման ակտիվիստներ են, կիրակի՝ երեկոյի հենց սկզբում, գրավել են հունական NET պետական հեռուսատաալիքի տաղավարը և խափանել հաղորդման հեռարձակումը:
Նրանք հայտարարել են, որ ուսանողական շարժման ներկայացուցիչներ են, և պահանջել են ուղիղ հեռուստաեթեր, որի ժամանակ պետք է հնչեցնեին իրենց ուղերձը կառավարությանը և ներկայացնեին պահանջները` կապված բարձրագույն կրթության մասին նոր օրինագծի հետ, որով, ըստ ակտիվիստների, խախտվում են ուսանողների իրավունքները: Հեռուստաալիքի ներկայացուցիչները բանակցություններ են վարել ուսանողների հետ: Ի վերջո, կողմերը համաձայնել են ուսանողների ուղերձը ձայնագրել և ցուցադրել հեռուստաեթերում:
Թեպետ միջադեպ պատճառով այստեղ են ժամանել ոստիկաններ, սակայն այն հարթվելուց հետո ակտիվիստները խաղաղ հեռացել են: Ձերբակալությունների մասին չի հաղորդվում: