Բուն ուղղափառ հավատից շեղումները միշտ էլ եղել են ու կլինեն: Ի վերջո, գաղափարական առումով մեկ երևույթը չի կարող անընդհատ նույն ձևով մնալ: Այսօր, սակայն, աղանդավորությունը դարձել է մի ուժ, հնարավորություն, որը մարդկանց միավորում է մի գաղափարի տակ ու շահագործում: «Առաջին լրատվականի» հետ զրույցում այսպիսի կարծիք հայտնեց հոգեբանական գիտությունների դոկտոր, հոգեթերապևտ Սամվել Խուդոյանը` խոսելով աղանդների առաջացման պատճառների մասին: Նրա խոսքով`աղանդների առաջացման հիմնական մոտիվը ոչ այնքան գաղափարական է, որքան մարդկանց հավաքագրումը:
«Չի կարելի անտեսել նաև փաստը, որ ցանկացած կրոն ունի նաև շեղումներ, օրինակ` իսլամը, բայց այն, ինչ տեսնում ենք ամբողջ աշխարհում՝ մարդկանց միջոցով ինչ-ինչ հարցեր լուծելու ցանկությունն է: Աղանդներ կան, որ զուտ քաղաքական նպատակներով են շահագործվում, աղանդներ`զուտ տնտեսական, անգամ՝ պատերազմական»,- նկատեց հոգեբանը` ընդգծելով, որ աղանդների դեմ հնարավոր է պայքարել միայն բարձրացնելով մարդկանց ինքնագիտակցությունը և այս հարցում պետք է իր ծանրակշիռ խոսքն ասի նաև Հայ Առաքելական եկեղեցին:
«Ինչո՞ւ է աղանդավորը գնում մարդկանց տները, իսկ եկեղեցու սպասավորները ինչ-ինչ միջոցներ չեն ձեռնարկում: Նրանք կարծես սպասում են, որ ժողովուրդը դեպի իրենց գնա: Ահա այս տեսանկյունից աղանդավորների տակտիկան ավելի ճիշտ է: Հիսուս Քրիստոսն ինքը գնաց մարդկանց հետևից, ոչ թե սպասեց, որ ժողովուրդը գա դեպի իրեն»,- ասաց Ս.Խուդոյանը` հավելելով, որ մեզանում ավելի շատ քաղաքացիական նախաձեռնություններն են պայքարում աղանդների դեմ, քան եկեղեցին:
Նրա խոսքով` աղանդավորները լավ հովանավորվում են Խղճի ազատության կոնվենցիայի կողմից` հաճախ իրենք բռնանալով մարդկանց խղճի վրա, քանի որ այն տեխնիկան, օրինակ` հիպնոսի, վախի, որով մարդուն գրավում են, մարդուն կախվածության մեջ է գցում:
