Կազանում ավարտվել է BRICS-ի եռօրյա գագաթնաժողովը, որին մասնակցել են 36 պետության ներկայացուցիչներ, Թաթարստանի մայրաքաղաք էր ժամանել նաև ՄԱԿ-ի գլխավոր քարտուղար Անտոնիու Գուտերեշը։
Ամփոփիչ ասուլիսի ժամանակ ՌԴ նախագահ Վլադիմիր Պուտինը նշել է, որ գագաթնաժողովի շրջանակում քննարկվել են ֆինանսական համագործակցության, արևմտյան գերակշռող վճարային համակարգերի այլընտրանքների մշակման, ինչպես նաև տարածաշրջանային հակամարտությունների կարգավորման հարցեր։
Պուտինը մեղադրել է արևմտյան երկրներին, որ խոչընդոտներ են ստեղծում «առավել արդար աշխարհակարգի անցման» և «գլոբալ հարավի ու արևելքի» երկրների անկախ զարգացման համար։
«Դրա օրինակներից մեկն Ուկրաինան է, որն օգտագործվում է Ռուսաստանի անվտանգության համար կրիտիկական սպառնալիքներ ստեղծելու նպատակով՝ անտեսելով մեր կենսական շահերը, արդարացի մտահոգությունները և ռուսալեզու մարդկանց իրավունքների ոտնահարումը։ Իսկ հիմա չեն էլ թաքցնում մեր երկրին ռազմավարական պարտության հասցնելու նպատակը»,- ասել է Ռուսաստանի ղեկավարը։
Պուտինը վստահեցրել է, որ գագաթնաժողովի մասնակից պետությունները շահագրգռված են ուկրաինական հակամարտության շուտափույթ ավարտով՝ «գերադասելով խաղաղ միջոցները»:
Ինչ վերաբերում է ֆինանսական խնդրին, ըստ Պուտինի՝ BRICS-ի երկրները կուժեղացնեն միջբանկային հաղորդակցությունն ու գործընկերությունը ֆինանսական հատվածում:
«BRICS-ի երկրները հանձնառու են խորացնելու գործընկերությունը ֆինանսական հատվածում և զբաղվելու արտաքին ռիսկերից անկախ փոխհաշվարկների մեխանիզմների ստեղծմամբ։ Ռուսաստանը հաշվարկների խնդիր ունի, բայց այն լուծվում է ազգային արժույթների միջոցով։ BRICS-ում դեռ չեն մտածում առանձին ընդհանուր վճարային համակարգ ստեղծելու մասին»,-ասել է ՌԴ նախագահը։
Ռուսաստանն առաջարկել է երկարաձգել Բրազիլիայի և Դիլմա Ռուսեֆի նախագահությունը BRICS Նոր Զարգացման բանկում: Պուտինը վստահ է, որ BRICS-ի երկրները կուժեղացնեն միջբանկային հաղորդակցությունն ու գործընկերությունը ֆինանսական հատվածում:
Նա ընդգծել է, որ BRICS-ը փակ ձևաչափ չէ, այն բաց է բոլորի համար, ովքեր կիսում են դրա արժեքները։
Նա անդրադարձել է Ուկրաինայում և Կուրսկում ընթացող մարտերին: Վլադիմիր Պուտինը նշել է, որ այս պահին Կուրսկում շրջափակման մեջ է 2000 ուկրաինացի զինվորական, և այժմ «սկսվել է նրանց չեզոքացման գործընթացը»: Ըստ Պուտինի՝ մինչև հիմա Ուկրաինան Կուրսկում տվել է մոտ 26000 զոհ:
Ուկրաինայի ճակատի վերաբերյալ Կրեմլի ղեկավարը վստահեցրել է, որ ՌԴ ԶՈՒ-ն առաջ է շարժվում բոլոր ուղղություններով: Նա կրկին հայտարարել է, թե ՆԱՏՕ-ի և արևմտյան երկրներն Ուկրաինայում կռվում են Ռուսաստանի դեմ՝ զինելով ուկրաինական բանակը: Ուկրաինայի հարցի կարգավորման՝ Դոնալդ Թրամփի ցանկության վերաբերյալ Պուտինն ասել է, որ հավատում է վերջինիս անկեղծ ձգտումներին:
