Հրապարակվել է տեսանյութ Կազանում Նիկոլ Փաշինյան-Իլհամ Ալիև երկկողմ հանդիպման մասին: Առայժմ այս պահի դրությամբ հանդիպման վերաբերյալ որևէ պաշտոնական հաղորդագրություն հրապարակված չէ: Փոխարենը, մինչ այդ Տելեգրամ ալիքներում հրապարակվել էր ԲՐԻԿՍ+ գագաթնաժողովի կադրեր, որտեղ ընդհանուր քննարկման ժամանակ Փաշինյանը ինչ-որ բան է ասում իր կողքին նստած Ալիևին:
Դրվագին անդրադարձել էր նույնիսկ Կրեմլի խոսնակ Պեսկովը՝ ասելով, որ գագաթնաժողովը երկկողմ շփումների հնարավորություն է նաև, և Փաշինյանն ու Ալիևը այդ կերպ չեն խանգարել ընդհանուր քննարկմանը: Այդօրինակ արձագանքը թերևս հուշում է, որ Կազանում երկկողմ հանդիպման հարցում որոշակի «կազմակերպական լումա» կարող է ունենալ ռուսական կողմը:
Ընդ որում՝ Պուտինը դեռևս հոկտեմբերի սկզբին ԱՊՀ երկրների ղեկավարների մոսկովյան հավաքի շրջանակում, հանդիպելով Փաշինյանին, ասել էր, որ Կազանում ԲՐԻԿՍ գագաթնաժողովը լայն հնարավորություն կլինի թե՛ իրենց նոր հանդիպման, թե՛ այլ երկրների գործընկերների հետ Փաշինյանի երկկողմ շփումների համար: Նիկոլ Փաշինյանը գագաթնաժողովի առավոտյան հանդիպում ունեցավ Իրանի նախագահ Փեզեշկիանի հետ: Ըստ էության՝ պաշտոնական ֆորմատով կազանյան նրա երկրորդ հանդիպումը Իլհամ Ալիևի հետ է:
Դա թերևս նշանակում է, որ կողմերն ունեն որևէ առարկայական հարց քննարկելու և ինչ-որ պայմանավորվածության գալու մտադրություն և պատրաստակամություն: Սա ուշադրության է արժանի թե՛ ԲՐԻԿՍ գագաթնաժողովի համատեքստում, թե՛ նաև ԱՄՆ նախագահ Բայդենի արդեն բավականին հայտնի նամակների ու Հայաստանին և Ադրբեջանին ներկայացված առաջարկների:
Արդյո՞ք Կազանում «կոմունիկացվում» է որևէ համաձայնություն, որը կունենա միջանկյալ-հռչակագրային բնույթ և այդպիսով նվազագույն բավարարվածության կամ հավանության կարժանանա կովկասյան իրավիճակով շահագրգռված բոլոր ուժային կենտրոնների համար, ըստ էության՝ ոչ մեկին չդնելով «անշրջելի» որևէ փաստի առաջ՝ մյուս կողմից թույլ տալով օգտագործել համաձայնությունը:
