Ադրբեջանական Salam News գործակալության փոխանցմամբ՝ Հայաստանի ու Ադրբեջանի արտգործնախարարներ Էդվարդ Նալբանդյանն ու Էլմար Մամեդյարովը Նյու Յորքում առանձին հանդիպումներ են ունեցել ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ռոբերտ Բրադկեի (ԱՄՆ) և ԵԱՀԿ գործող նախագահի անձնական ներկայացուցիչ Անջեյ Կասպրշչիկի հետ։
Հանդիպումների ընթացքում կողմերը քննարկել են ղարաբաղյան հակամարտության կարգավորման հարցը։ Էդվարդ Նալբանդյանն ընդգծել է, որ ղարաբաղյան բանակցային գործընթացում առաջընթացի գրանցումը հնարավոր կլինի այն դեպքում, եթե Ադրբեջանը հետ վերցնի այն 10 փոփոխությունները, որոնք առաջ է քաշել հունիսի 24-ին Կազանում տեղի ունեցած եռակողմ գագաթնաժողովի ժամանակ:
Բացի այդ, կողմերը կարևորել են 2010 թվականի հոկտեմբերի 27-ին Աստրախանի գագաթնաժողովում ձեռք բերված հայ-ադրբեջանական շփման գծում գրանցվող միջադեպերի հետաքննության մեխանիզմի ստեղծման վերաբերյալ պայմանավորվածության իրագործումը:
Մամեդյարովն իր հերթին նշել է, որ հայկական կողմը հրաժարվել է Մադրիդյան նորացված սկզբունքներից և դրանով իսկ սպառնալիքի տակ դրել ողջ բանակցային գործընթացը։ Ըստ Մամեդյարովի՝ ղարաբաղյան բանակցային գործընթացում առաջընթացի արձանագրումը հնարավոր կլինի այն դեպքում, եթե հայկական կողմն ընդունի այն պաշտոնական փաստաթուղթը, որը ԵԱՀԿ Մինսկի խմբի համանախագահները 2009 թվականի դեկտեմբերին ներկայացրել են Հայաստանին ու Ադրբեջանին։
