Եմենի մայրաքաղաք Սանաայում երեկ իշխանությունները գնդացիրներից կրակ են բացել ընդդիմադիրների ճամբարի վրա: Կրակոցներ են արձակվել նաև դիպուկահարների կողմից: Այս ամենը տեղի է ունեցել Սաուդյան Արաբիայից երկրի նախագահ Ալի Աբդալլահ Սալեհի վերադառնալուց հետո, որտեղ նա ահաբեկչությունից հետո ստացած ծանր վնասվածքների պատճառով բուժվում էր: Այս մասին հաղորդում է Reuters գործակալությունը:
«Նրանք (Եմենի իշխանությունները.- 1in.am) կիրառել են զրահատեխնիկա և հրացաններ: Դա կատաղի մարտ էր: Իմ տունը ցնցվում էր կրակոցներից»,- գործակալությանն ասել է միջադեպի ականատեսներից մեկը: Կրակոցներից հետո հազարավոր ընդդիմադիրներ, որոնք գտնվում էին այդ ճամբարում, ստիպված էին փախչել: Ականատեսի խոսքերով` առնվազն 10 մարդ է զոհվել գնդակոծության հետևանքով:
Հիշեցնենք, որ այս տարվա սկզբից Եմենում չեն դադարում հակակառավարական բողոքի ակցիաները, որտեղ պահանջվում է երկիրն արդեն 33 տարի շարունակ ղեկավարող Ալի Աբդալլահ Սալեհի հրաժարականը: Այս ընթացքում Եմենում բախումների հետևանքով զոհվել են հարյուրավոր մարդիկ:
