Ադրբեջանական Salam News գործակալության փոխանցմամբ՝ Ադրբեջանի նախագահ Իլհամ Ալիևն Ադրբեջանի անկախության 20-ամյակին նվիրված միջոցառման ժամանակ անդրադարձել է ղարաբաղյան հակամարտության կարգավորմանը.
«Ղարաբաղյան հակամարտությունն Ադրբեջանի ամենամեծ խնդիրն է։ Այն սպառնում է ոչ միայն Ադրբեջանին, այլև՝ ողջ տարածաշրջանին։ Հայաստանի «իրականացրած» էթնիկ մաքրման արդյունքում «1 միլիոն» ադրբեջանցիներ դարձել են փախստականներ ու հարկադիր վերաբնակներ։ Դժբախտաբար, իրավիճակը ցայժմ չի փոխվել։ Լեռնային Ղարաբաղի վերաբերյալ ՄԱԿ-ի ու միջազգային այլ կառույցների որոշումները մնացին թղթի վրա։
Եկեք ավելի լայն մտածենք։ Ադրբեջանն աշխարհիկ երկիր է, ուր կարող են խաղաղ և հանգիստ բնակվել տարբեր ազգությունների ու դավանանքների ներկայացուցիչներ։ Լեռնային Ղարաբաղում կարող են կիրառվել ինքնավարության եվրոպական հաջողակ մոդելները»։
Ալիևը նաև նշել է, որ Հարավային Կովկասի տնտեսության 70 տոկոսը բաժին է ընկնում Ադրբեջանին։
Հիշեցնենք, որ հունիսի 24-ին տեղի ունեցած Կազանի եռակողմ գագաթնաժողովի նախօրեին Euronews-ին տված հարցազրույցում Իլհամ Ալիևը հայտարարել էր. «Մենք պատրաստ ենք Լեռնային Ղարաբաղի բնակիչներին և այնտեղ վերադարձողներին տրամադրել ամենալայն ինքնավարության երաշխիքներ, ինչը հնարավոր է միայն խաղաղության դեպքում:
Ինքնավարության տեսակը կհանդիսանա մեր հետագա բանակցությունների քննարկման առարկան, և մենք կարծում ենք, որ դա կարող է լինել լայն ինքնավարություն: Եվրոպայում գոյություն ունեն մեզ համար ինքնավարությունների դրական և լավ օրինակներ:
Դրանցից է Իտալիայի ու Տիրոլի օրինակը, ինչպես նաև այլ վայրեր, ուր կենտրոնական իշխանությունը մեծ ուշադրություն է հատկացնում ինքնավարություններում բնակվողներին: Ադրբեջանը ֆինանսական մեծ հնարավորություններ ունի, և մեզ համար մեծ խնդիր չէ Լեռնային Ղարաբաղի տնտեսական ու սոցիալական զարգացման համար լուրջ ծրագրեր ձեռնարկելը»։