Այսօր «Մոսկվա» կինոթատրոնում տեղի կունենա «Իսկական կինո» (Real Movie) խորագրով ֆիլմի ցուցադրությունը:
Ֆիլմի հեղինակների խոսքով` այն կինոյի տարբեր ընկալումների, կինոդիտողի տարածված շերտավորումների մասին է, որի պարագայում կինոդիտողները բաժանվում են երեք խմբի` ինտելեկտուալներ, քաղքենիներ և կինո սիրող հանդիսատես:
Գործողությունները կատարվում են կնոդահլիճում և էկրանին, որտեղ առանձին ֆիլմ է պատկերվում` ինտելեկտուալ հատվածով, ռոմանտիկ հատվածով և կիսամարտական տեսարանով:
Կինոդիտողի ներկայացված երեք շերտերից յուրաքանչյուրն ունի իր համար ընկալելի, ընդունելի մասն ու անընդունելին, անհանդուրժելին: Բայց կան փոքրաթիվ ֆիլմեր՝ իսկական կինո, որ բոլորի համար են:
Ֆիլմի դերակատարներից Արսեն Գրիգորյանը, շատ չցանկանալով բացել փակագծերը, «Առաջին լրատվական»-ի հետ զրույցում ասաց, որ ֆիլմում մարմնավորում է մի հերոսի, որը իր սիրած աղջկա հետ եկել է հանդիսասրահ ու ֆիլմ է դիտում:
«Ֆիլմն այն մասին է, որ տարբեր ֆիլմեր տարբեր հանդիսատեսի են գրավում, բայց կա ֆիլմ, որի առաջ բոլորը խոնարհվում են»,- նշեց դերասանը:
Ֆիլմի սցենարի հեղինակն ու ռեժիսորը Հրաչյա Զաքարյանն է, կոմպոզիտորը` Հայկոն: Դերերում հանդես են գալիս Աշոտ Տեր-Մաթևոսյանը, Նազենի Հովհաննիսյանը, Քրիստինա Հովակիմյանը, Գրիգոր Դանիելյանը, Արսեն Գրիգորյանը:
