«ՀՀ զինված ուժերի զորահանդեսը ցույց տվեց, որ Ադրբեջանը մեր հանդեպ ռազմական գերազանցություն չունի: Ավելին` Բաքվի պրոպագանդան փուչիկ էր, որը պայթեց»,- այսօր հրավիրված ասուլիսի ընթացքում նշեց ռազմական փորձագետ Դավիթ Ջամալյանը: Նա միաժամանակ նկատեց, որ Ադրբեջանի կողմից կատարվում են մեր ռազմական զորահանդեսը վարկաբեկելու փորձեր:
Նույնիսկ նրանց փորձագետներից մեկը նշել է, թե այս զորահանդեսն ավելի վատն էր, քան 2006-ինը, քանի որ 200.000-ով ավելի քիչ մասնակից ուներ, իսկ տեխնիկան քարշակներով է մուտք գործել: «Եթե ամենահզոր արգումենտը սա է, ապա կարելի է ենթադրել, թե ինչ խուճապ է նրանց մոտ: Բացի դա` այս ամենը խոսում է այն մասին, որ գործ ունենք տիպիկ թուրքական մտածելակերպի հետ. ինչքան շատ` այնքան լավ»,- ավելացրեց Ջամալյանը:
2006-ի համեմատ` այս տարվա առավելությունները, ըստ Դավիթ Ջամալյանի, շատ են. առաջին` հրթիռային տեխնիկայի առկայությունը, երկրորդ` «Իսկանդեր» հրթիռին մի քիչ զիջող «Տոչկա ռու» հրթիռը, երրորդ ` «S300» հրթիռը, որով ադրբեջանական տեխնիկան դառնում է անգործունակ:
Իսկ մեր հպարտությունը անօդաչու կռունկ-հրթիռն է:
Ինչ վերաբերում է այն հարցին, որ մեր բանակը «Սմերչ» տեխնիկայով զիջում է Ադրբեջանին, փորձագետը նշեց, որ եթե այն չցուցադրվեց, դա չի նշանակում, որ չունենք:
Խոսելով պատերազմի հավանականությունից` Ջամալյանն ասաց, որ մենք նախահարձակ չենք լինի, մենք պետք է իրականացնենք ուժեղ պաշտպանություն: Ինչ-ինչ հարցերում մենք առավելություններ ունենք, և այդ ամենը աչքի առջև ունենալով` Ալիևը չի գնա պատերազմի:
Լրագրողների այն հարցին, թե արդյոք ունե՞նք էլի այնպիսի տեխնիկա, որը չի ցուցադրվել, Ջամալյանը պատասխանեց, որ նման տվյալների չի տիրապետում, հետևաբար զերծ կմնա մեկնաբանություններից:
