Օրերս «Առաջին լրատվական»-ը բացառիկ հարցազրույց է ունեցել ՀՀ ոստիկանապետ Ալիկ Սարգսյանի հետ: Ներկայացնում ենք հարցազրույցից մի հատված:
-Պարոն Սարգսյան, այսօր ոստիկանության համակարգի ամենաաղմկոտ գործերը շարունակում են մնալ Հովհաննես Թամամյանը և Մարգար Օհանյանը: Երկուսն էլ, փաստորեն, կալանավորված են: Ընդհանուր հասարակական տրամադրություններն այսպիսին են՝ եթե այս մակարդակներում այս իրավիվիճակն է, ուրեմն վերևում ինչեր են կատարվում: Թալանված այն թվերի մասին, որոնց մասին խոսվում, գրվում է ի՞նչ կասեք: Օրինակ՝ միայն մեքենա լվանալու փաստը, երբ բյուջեից հատկացված հսկայական միջոցները գրպանվել են:
– Բենզինի մասով ասեմ, որ դրա համար քրեական գործ է հարուցված, և ցավում եմ, որ կապված էր Մարգար Օհանյանի հետ: Շատ ցավում եմ։ Մեր հարաբերությունների մասին բոլորը գիտեին: Նորմալ ընկերական, մարդկային հարաբերություններ էին: Մարգար Օհանյանը այդ մասին արդեն գիտեր, որ քննություն է տարվում: Մինչև իր ձերբակալումը պնդում էր, որ ինքը կապ չունի: Մի անգամ եկավ ինձ մոտ և խնդրեց՝ թե՝ «Այսպիսի ինֆորմացիա ունե՞ք, ես խնդրում եմ՝ ստուգեք. ուրեմն, ես էլ եմ խաբված, ինձ էլ են խաբել, ես էլ եմ վիրավորված: Ստուգեք, մեղավորներին պատժեք»։ Նա այդպես էր ասում մինչև իր ձերբակալությունը: Հիմա չգիտեմ՝ ինչ կասի, բայց նա մինչև վերջին պահը հրաժարվում էր: Ես ոչ թե դրանով ինչ-որ բան եմ ակնարկում, որ եթե իմանայի ինքն էր՝ կներեի, ո՛չ, դա ներելու բան չէ:
Այսօր համակարգում վառելիքի լուրջ խնդիր ունենք, լուրջ պրոբլեմ կա: Կրճատումներ ունենք, որ համակարգը չի կարողանում իրեն հասանելիք ամբողջ բենզինը ստանալ: Այս պարագայում բենզին տանել և խանգարել համակարգի աշխատանքին, էլ չեմ խոսում կոռուպցիոն ռիսկերի մասին, կոռուպցիոն, որ տեսուչը, բենզին չստանալով, պիտի անպայման ձեռնաքաշությամբ զբաղվի, որպեսզի վառելիք լցնելու համար գումար աշխատի… Ես դա ներել չէի կարող, անկեղծորեն եմ խոսում: էլ չեմ ասում մնացած պաշտոնյաների մասին, երկրի ղեկավարի մասին, որը իր հստակ պայմանները արդեն թելադրել է, մենք էլ պարտավոր ենք այս խաղի կանոններին ենթարկվել, այլապես ինքներս հանցագործություն ենք կատարում: Բենզինի մասին ես որևէ պարզաբանում չունեմ, ինչ որ լսել եք՝ այդ ամենը իրականություն է, իսկ ինչ վերաբերում է ավտոլվացումներին, արդեն ավարտել եմ ստուգումները, այնպես չէ, որ ամսական եղել է 30 միլիոն դրամ: Այդ ինֆորմացիան ճիշտ չի ներկայացված: Օրինակ՝ տարեկան եղել է 30 միլիոն դրամ, մեկ անգամ եղել է 100 միլիոն դրամ, եթե չեմ սխալվում՝ 2009 կամ 2010 թվականին: Բայց ճանապարհային ոստիկանությունը դրանից օգտվելու իրավունք ունի, մեքենաները պետք է մաքուր լինեն, դրա համար մենք գումար ենք նախատեսում, այնպես չէ, որ մեքենաները տանեն իրենց գումարներով լվանան: Բյուջեից այդ գումարները հատկացվում է, որ մեքենաները պետք է լվացված լինեն ու մաքուր, այլապես նրանք իրավունք չունեն դուրս գալու արտաքին ծառայության: Հնարավոր է, որ որոշ մարդիկ մեկ օր չգնան մեքենա լվալու, դա հիմա ամբողջությամբ ստուգելն արդեն դժվարություն է ներկայացնում: Բայց և՛ օպերատիվ ճանապարհով, և՛ ուղղակի մարդկանց հրավիրել ենք, լսել ենք, համապատասխան նյութեր ենք ստեղծել. մեքենաների լվացումը համապատասխան լվացման կետերում կատարվել է: Ինչ վերաբերում է ամսական 30 միլիոն դրամին՝ կարծում եմ, ինֆորմացիան ուղղակի ճիշտ չէ:
Հարցազրույցն ամբողջությամբ կարդացեք ավելի ուշ:
